Пытартыш ийлаште кугыжаныш еш-влакын илышыштым утыр куштылемдаш тырша. Изирак ставкан ипотекым темла, шуко шочшан еш-влаклан тӱрлӧ гарантийым пуа да молат.
Теве 5 сентябрьыште Йошкар-Олаште йоча арверым прокатыш пуышо пунктым торжественно почмо. Ынде республикыштына Социальный обслуживанийын 17 комплексный рӱдерыштыже самырык ача-ава-влаклан полышым пуат. «Мир добра» манын лӱмдымӧ тыгай верлаште кум ияш марте йочам куштымаште кӱлешан арверым прокатыш налаш йӧным ыштыме.
Аза шочмеке, ятыр погым ача-авалан икмыняр тылзылан гына налаш верештеш. Акшат шулдо огыл. Сандене «Еш» нацпроект ден регионышто аза шочмым шукемдыме шотышто программе почеш тыгай пункт-влакым ыштыме.
Тушто тыглай да йыгыр азалан коляскым, кроватьым, матрасым, пукшаш йӧнештарыме пӱкеным, азам вӱдылаш келыштарме ӱстембалым, шезлогым, ванночкым, видеоняньым, ходунким куд тылзылан оксам тӱлыде пуат, варажым тиде срокым шуяшат лиеш.
Кӧлан пуат:
- 35 ияш марте ача-ава-влаклан;
- 3 ияш деч изирак йочам ончышо студент ешлан;
- тичмаш огыл ешлан;
- нужнан илыше ешлан;
- шуко шочшан ешлан;
- марлан кайыдыме шкет ӱдырамашлан;
- инвалид йочам куштышылан;
- тулык йочам але ача-ава попечений деч посна кодшо икшывым куштышо ешлан;
- ча-ава кокла гыч иктыже але коктынат ийготыш шудымо улмо ешлан.
Нине еш-влак арверым налме йодыш дене илыме верлаште Социальный обслуживанийын комплексный рӱдерышкыже мийыман.
Фотом Марий Элысе Паша да социальный аралтыш министерствын сайтше гыч налме.