Марий Элыште 8-11-ше класслаште да колледжлаште тунемше студент-влак программированийын йылмыжым оксам тӱлыде тунем кертыт.
Ты паша «Код будущего» проект почеш илышыш шыҥдаралтеш. 2023-2024 тунемме идалыкыште тушко ушнаш манын, Госуслуги порталыште йодмашым погаш тӱҥалме. Тудо 30 сентябрь марте шуйна.
«Яндекс», «1С», «Учи.Дома» онлайн-школын, Москосо Бауман лӱмеш технический университетын, Иннополис университетын але моло палыме ИТ-компаний ден вуз-влакын курсышкышт возалташ лиеш. 68 курс уло.
Python, Java, C++, C#, 1C, Lua, SQL, JavaScript да моло йылмым тунемаш йӧн ышталтеш. Тунеммылан 144 шагат ойыралтеш. Участник-влак онлайн да офлайн йӧн дене шинчымашым налын кертыт.
Иктешлыме экзамен-влакым сайын кучымеке, курсым эртыме шотышто сертификат пуалтеш.