Кызыт кредитым, займым шукын наледат. Но вара чыланжак жапыштыже тӱлен огыт керт, коллектор-влак лӱдыктылаш тӱҥалыт. Тыгай годым мом ыштыман?
Игорь.
Йошкар-Ола.
Суд пристав-влак федеральный службын Марий Эл Республикысе управленийжын пӧлкажым вуйлатыше Сергей Вылегжанин вашешта:
– Коллектор-влакым уголовно мут кучаш шогалтыме шотышто лӱмын нормым ямдылыме. Тиде Россий Уголовный кодексын «Незаконное осуществление деятельности по возврату просроченной задолженности физических лиц» 172.4 статьяже. Тудо 2023 ий 21 июль гыч вийыш пурен. Ты закон почеш кӱсыным пӧртылтымӧ дене кылдалтше сомылым шуктышо-влак тӱрлӧ семын лӱдыктылшаш, шоям ойлыштшаш огытыл.
Республикыштына ик коллекторский организацийым гына регистрироватлыме. Тиде «Стимул» ООО. Но кӱсынан еҥлан парым шотышто вес коллектор-влакат йыҥгыртен кертыт. Тыгай фирмын чын улмыжым официальный кредитный да микрофинансовый организаций-влакын реестрыштышт тергаш лиеш. Тыгай реестрым Россий Банк ышта.
Кушко каяш?
Кӱсыным пӧртыл-тымӧ шотышто чот витараш тӱҥалыныт гын, еҥ-влак Суд пристав-влак федеральный службыш эҥертен кертыт. Марий Элысе управленийыште тидлан лӱмын пӧлкам ыштыме. Тысе пашаеҥ-влак ты федеральный законым шуктымым тергат. Законым пудыртымо годым кредиторым але тудын еҥжым административно мут кучаш шогалташ лиеш. Еҥлан 500 тӱжем теҥге марте, организацийлан 2 миллион теҥге марте штрафым пуэн кертыт.
2023 ийыште управлений пашаеҥ-влак ты статья почеш 18 административный делам онченыт. Титакан-влаклан 1 миллион утла теҥге штрафым тӱлаш пуымо.
Йодмаш пелен законым пудыртымым пеҥгыдемден кертше документ-влакын копийыштым: кредитований нерген договорым, телефон йыҥгыр да смс-сообщений-влак распечаткым (тудым сото кыл оператор деч але Личный кабинетыште налаш лиеш), телефон дене мутланыме аудиозаписьым, уло гын, видеозаписьым – пуаш кӱлеш.
Кредитор але тудын еҥже айдемын чапшым волта, лӱдыктылеш гын, йодмашым полицийышкат пуыман.
Йоҥылыш йыҥгыртат
Заёмым налмеке, еҥ-влак южгунам шке родо-тукымыштын, пошкудыштын але коллегыштын телефон номерыштым ончыктат. Вара нунылан коллектор-влак йыҥгырташ тӱҥалыт. Тыгай годым кӱсындымӧ еҥлан йыҥгыртеда манын каласыман. Йыҥгыртыше тендан фамилийдамак ойла, но те кредитым налын огыдал гын, ты организацийым вуйлатыше лӱмеш лекше умылыдымашым решатлаш йодын возыман. Тыгак коллектор-влак дене кеч-могай кылым ышташ тореш улмыда шотышто уведомленийым колташ лиеш.
Пашам ыштыме радам
Кӱсыным пӧртыл-тымӧ шотышто айдемылан суткаште ик гана, но арняште кок гана да тылзыште кандаш гана деч шуко йыҥгырташ ок лий. Паша кечын – 8 шагат гыч 22 шагат марте гына, а каныш да пайрем кечылаште – 9 шагат гыч 20 шагат марте. Но сообщенийым кок пачаш чӱчкыдынрак колташ лиеш. Кӱсын кокыт-кумыт уло гын, коллектор-влак дене тунар гана мутланаш логалеш.
Кӱсынан еҥ дене мутланыме годым кредитор (але тудын еҥже) лӱм ден фамилийжым, организацийжым каласышаш да мутланымашын возалтмыж нерген шижтарышаш. Кӱсынан еҥат коллектор дене мутланымыжым воза гын, сайрак. Закон почеш, кугыжаныш реестрыш пурталтше юрлица-влак мутланымашым кум ий аралышаш улыт. Но шотдымын пашам ыштыше организаций-влак чыла мутланымашым огытат возо.
Тылеч посна кредиторын вес еҥлан кӱсын нерген каласаш праваже уке: тыгай уверым интернетышкат, подъезд омсашкат возен ок керт. Паша верышкат йыҥгыртышаш огыл.
Адакшым кӱсынан еҥ, закон дене келшышын, кредитор-влак дене мутланаш тореш лийын кертеш. Тидлан кредиторлан але коллекторлан йодмашым заказной серыш але нотариус гоч колтышаш. Но тидым, кӱсын погынымеке, ныл тылзе гыч гына ышташ лиеш. Тыгаяк йодмашым адвокат гоч веле мутланышт манын колташ лиеш.
Законын положенийже заёмщикын праважым да интересшым аралымашке виктаралтын гынат, парыман еҥ кӱсыным пӧртылтымӧ деч огеш утаралт.