Оксам кусарыме годым реквизитыште ик цифрым йоҥылыш ончыктенам. Ынде окса кушко кайымым омат пале. Тыгай годым мом ыштыман, кузе тудым пӧртылтыман?
Галина. Оршанке район.
Роспотребнадзорын Марий Эл Республикысе управленийжын пресс-службыжо умылтара:
– Тыгай годым вигак банкыш йыҥгыртыман да оксам кусарыме кечым, жапым да кугытым каласыман.
Тенданак йыҥгырты-мыдам умылаш манын, оператор тергыше йодыш-влакым (паспорт данныйым, кодовый мутым, карте почеш пытартыш гана кунам да мыняр оксам кусарымым, адресым але банкыште кодымо вес информацийым) йодын кертеш.
Банк операцийым ышташ тӱҥалын шуктен огыл гын, тудым шӧра. Окса банк кӧргысӧ специальный счётыш логалын гын, окса пӧртылмеке, тидым оператор деч рашемдаш лиеш.
Оксада ала-кӧлан каен шуктен гын, банк отделенийыш мийыман да йоҥылыш оксам колтымо шотышто йодмашым возыман. Тыгодым банк пашаеҥ деч оксам колтымыда шотышто квитанцийым йодман да йодмашдан копийжым ыштыман. Тушто банкын йодмашдам налме шотышто палемдымашыже лийшаш.
Клиентын порученийже почеш колтымо оксам пӧртылташ банкын обязанностьшо уке. Но банкысе менеджер тыгай годым кузе сайрак ыштыме шотышто каҥашым пуэн кертеш.
Мутлан, окса иктаж организацийын счётышкыжо каен гын, тудын контактшым муаш да бухгалтерий дене кылдалташ лиеш. Тушто оксам йоҥылыш кусарыме нерген йодмашдан копийжым да квитанцийым ончыктыман. Тыге оксам пӧртылташ лиеш.