Йошкар-Оласе йоча инфекционный эмлымверыште эмлалтше икшыве-влак У ий вашеш ӧрыктарыше сӱретым ужыныт – палатысе окнаштым Йӱштӧ кугыза пералтен.
Утарыше-влакын кечыштлан келыштаралтше «Новогодний десант» акцийым Марий Элысе аварийно-утарыше службо да Российысе утарыше-влакын студенческий корпусшын Марий Элысе пӧлкажын еҥышт эртареныт.
Йӱштӧ кугыза семын чиен, альпинист снаряженийым кучылтмо дене утарыше-влак, медучрежденийысе палате окнам тӱкалтен, йоча-влакым саламленыт. Ӱдыр-рвезе-влак Йӱштӧ кугызалан почеламутым сылнын лудыныт да тыгай саламлымашлан моткоч куаненыт.
И.Александрова, Э.Терентьева.