Студент илыш – пеш оҥай пагыт. Но ты гана ме вес тӱрлырак студент-влак дене палдарена. Нуно экзаменым строгий режиман колонийыште кучат. А сессийым сдатлымеке, ны шочмо суртыш, ны унала каяш йӧнышт уке.
Россий УФСИН-ын Марий Эл Республикысе 6-шо №-ан строгий режиман исправительный колонийыштыже 18 тыгай студент уло. Нуно Российысе тӱрлӧ вуз ден колледжыште шинчымашым погат. Колонийын администрацийже тунемше-влаклан посна пӧлемым ойырен. Тушто компьютер, тунемаш келыштарыме вер-влак улыт. Икымше студент-влакым туныктен лукмылан лу ий эртен, да дисциплиным пудыртышо-влак лийын огытыл гынат, тунемме процессым эскераш манын, видеонаблюденийым келыштарыме.
Тыгай студент-влаклан «Библиотеки информационно-образовательных ресурсов» организацийын Йошкар-Оласе филиалже тунемаш полша. Образовательный платформылан оксам тӱлыман. Сандене студент-влак олмеш нунын родышт оксам колтат, але нуно шкешт колонийын производствыштыжо ыштен налме оксам тӱлат. Тыгодым могай дисциплиным тунемшашым да могай направлений дене вияҥшашым студент шке ойырен налеш. Проектын координаторжо семестрлан ик гана колонийыш толеш. Исправительный учрежденийыш студент-влаклан тунемме материалым конда, программе дене полша да компьютерыште улшо контрольный паша-влакым тергаш наҥгая. Тыгак группышто шкешотан старосто Руслан Ершов дене мутлана. Тудо тунемме верлаште порядкым эскера да планым шуктымым терга.
– Мый «Прикладной информатике» специальность дене тунемам. Диплом пашам нейронный сеть-влак дене кылдалтын. Кызытсе жапыште IT-специалист-влак кӱлешан улыт. Экономике аланыште шинчымашем начаррак, сандене, эрыкыш лекмеке, тиде экшыкым кораҥдаш шонем.
Экзамен ден зачёт-влакым сдатлаш неле огыл. От пале гын, тунемаш, книгам шергалаш да уэш тестым эрташ лиеш. Тӱҥжӧ – семестр жапыште ойырен налме дисциплине материалым тунем шукташ.
Мыйын кӱшыл шинчымашем уло, сандене, студент илышын ямжым палем. А кӧ икымше гана ты корным такырта, тудлан кертмем семын полшем, – каласыш Руслан.
Судитлалтше-влак, тунемаш йӧнан лийже манын, занятийыш кок смене дене коштыт. Кажне тӱшка ныл шагат дене тунемеш.
Шкем сайын кучымылан, шинчымашым налмылан кӧра шуко студент режиман учреждений гыч жап деч ончыч лектеш. Тыгодым кӧ тунем пытарен огыл, тудо умбакыже эрыкыште тунем да диплом пашам аралаш тӱҥалеш.
Материалым ямдылаш Россий УФСИН-ын Марий Эл Республикысе пӧлкажын пресс-службыжо полшен.