Кеҥежат эртен кайыш. Тений тудо мо дене молгунамсе деч ойыртемалтын? Тидым ятыр ий игечым эскерыше Геннадий Рыбаков радамла:
– Йошкар-Олаште пытартыш нылле ийысе кеҥеж дене таҥастараш гын, тений кеҥежым 1,15 градуслан шокшырак лийын, кеҥежын икымше пелыже – 3 градуслан левырак, а кокымшо пелыже – 0,8 градуслан юалгырак. Пытартыш 40 ийыште шукыж годым кеҥежым кокымшо пелыже икымше пелыж деч 0,6 градуслан шокшырак шоген (23 гана). Тений кеҥежын икымше пелыже кокымшо пелыж деч 3,2 градуслан шокшырак лийын.
Тений июньын икымше пелыштыже игече ойыртемалтын, пытартыш 40 ийыште эн шокшо семын палемдалт кодеш. А июньын кокымшо пелыштыже июльын кокымшо пелыж дечат 0,15 градуслан шокшырак лийын. Июнь мучкыжат тений июльысо деч 0,1 градуслан шокшырак лийын. А вет пытартыш 35 ийыште июльышто игече июнь деч 2,7 градуслан шокшырак шоген. Август дене таҥастараш гын, июнь 3 градуслан шокшырак лийын.
Пытартыш 42 ийыште тенийысе июнь деч шокшырак 1991 июньышто (0,2 градуслан шокшырак) да 2021 ийыште (0,4 градуслан) гына шоген.
Иктешлаш гын, тыге палемдаш лиеш: тенийысе июнь пытартыш 35 ийысе июнь деч кокла шот дене 3,4 градуслан шокшырак лийын, июль – 0,5 градуслан, а август – 0,1 градуслан шокшырак.
Пытартыш 30 ийыште Йошкар-Олаште кеҥеж мучко кокла шот дене 30 кече йӱран лийын, а тений – 34 кече. А ояр игече молгунам кокла шот дене 57 кече шоген, тений – 68 кече.
П.Васильевын фотожо.