Ӱдырамаш илышым сӧрастараш шочын, маныт. Тӱнясе чыла кӱчык-кужум шокшо йӧратымашышт, поро кумылышт, шӧртньӧ кид-йолышт дене тӧрлат.
Амалкалче Наталья Кукушкина – «Озаҥысе идеальный ава-2023» конкурсышто икымше вице-миссис. Тыгак тудо кодшо ийын «Озаҥысе миссис бизнес вумен» лӱмым сулен.
Пошкудо олаште илыше Наталья ден Алексей Кукушкинмыт бизнесым пырля ворандарат. Нуно шке компанийыштым 16 ий ончыч почыныт. «Улица Строителей» маналтше компанийышт кызыт кумдан палымыш савырнен – тудо 1000 утла тӱрлӧ кермычым элна мучко ужала.
Самырык-влакын еш возак тулыштат волгыдын йӱла. Кукушкинмыт кок икшывым ончен куштат. Натальян ача-аваже марий улыт, сандене ешыште марий шӱлыш озалана.
10 ияш Володя эргышт «Золотые Бусины» лӱман частный школышто «Монтессори» программе дене тунемеш. Шке кидше дене тӱрлым ыштылаш йӧрата, сандене робототехнике ден оригами кружок-влакым ойырен налын. Икмыняр ий айкидо дене заниматлен, а ты кечылаште греко-римский кучедалмаш секцийышке возалтын.
Куд ияш Василиса ӱдырышт «Золотые Бусины» частный йочасадыш коштеш. Тылеч посна мураш, балетым кушташ тунемеш да изи сеҥымашлаж дене уло ешым куандара.
Йоча-влак уста шӱлышан кушкыт. Коктынат сӱретлаш тунемаш да Рушарня школыш коштыт. Тушто марий тӱвыра дек утыр лишемыт.
Тений гыч Наталья Кукушкина Татарстанысе марий-влакын НКА-штым вуйлата. А Озаҥысе тыгаяк автономийыште сомылым аваже, Людмила Ивановна Мусихина, ятыр ий ворандара.
Кызыт пошкудо республикыште илыше 30 амалкалче 25 мартыште эртышаш «Татарстан Республикын бизнес миссше да миссисше» конкурслан ямдылалтеш. Нунын коклашке чевер марий ӱдырамашна Наталья Кукушкинат ушнен. Ме тудлан тиде конкурсышто да чумыр пашаштыжат сеҥымашым тыланен кодына.
Эльвира Терентьева.
Фото-влакым еш альбом гыч налме.