Ватем дене ойырленна. Эргына уло. Ватем дене шке коклаштына мутланен келшенна: кажне тылзын банкысе счётышкыжо оксам колтем. Чыла чекым аралем. Тидым иктаж-кузе официально оформитлаш кӱлеш мо? Трук ватем иктаж-гана алиментлан пуаш шонен пышта. Ала ватемлан оксам колтедыме олмеш эргымлан счётым почын да тушко кажне тылзын оксам оптен кертам?
ВЛАДИМИР.
Морко район.
Суд пристав-влак федеральный службын Марий Эл Республикысе управленийжын Правовой обеспечений да кугыжаныш реестрым вӱдымӧ, кӱсыным пӧртылтышӧ юридический лица-влакын пашаштым тергыше пӧлкажым вуйлатыше Сергей Вылегжанин вашешта:
– Мутат уке, йочам ончымылан оксам колтымо фактым аралаш кӱлеш. Вет ватыда судышкат алиментлан пуэн кертеш. Но тудын дене йочам ончымо шотышто кутырен келшенда, тидыже РФ законодательстве дене шотлан толеш. А вес гана умылыдымаш ынже лек манын, ойпидышым ышташ лиеш. Тушто йочам ончымо шотышто чыла условийым (йочам ончымылан оксам тӱлымӧ шотыштат) ончыктыман. Тудым нотариус дене пеҥгыдемдыман.
Алиментым кажне тылзын тӱлыман. Йочалан счётым почмаш да тушко оксам оптымаш оксам кучылташ йӧным огеш пу, садлан тиде ачан йочам ончымо обязанностьым шуктыдымылан шотлалташ тӱҥалеш.