Тиде модыш дене утларакшым тӱҥалтыш класслаште тунемше-влак модыт. Тӱшкан погынен шогалыт, лудыш почеш иктым оҥго покшеке шогалтат. Тӱшкан тыге муралтат:
Ойлен колто, Танюша,
Ончыктен пу, Танюша,
Кидым-шургым кузе мушкат,
Кидым-шӱргым кузе мушкат?
Оҥго покшелне улшо Танюша тыге вашешта:
Вот тыге, вот туге,
Теве тыге, вот туге!
Кидше дене, капше дене кидым, шӱргым мушмым ончыкта. Умбакыжым тӱшкан тыге муралтат:
Ойлен колто, Танюша,
Ончыктен пу, Танюша,
Пӱэтым кузе эрыктет,
Пӱэтым кузе эрыктет?
Танюша тыге вашешта, шогылтмыжым тарваныл ончыкта:
Вот тыге, вот туге,
Теве тыге, вот туге.
Модшо-влак умбакыже тыге шуйдарат:
Ойлен колто, Танюша,
Ончыктен пу, Танюша,
Кап-кылетым кузе ӱштат,
Кап-кылетым кузе ӱштат?
Танюша вашмутым пуа:
Вот тыге, вот туге,
Теве тыге, вот туге!
Тыге кок-кум рвезым изи артистым ыштен модыт.
Модышым А. Е.Китиковын «Модыш — уш погыш: Марий калык модыш-влак» (1993) книгаж гычын налме.