Морко районысо приёмный еш-влакын «Родник» клубышт уло. Тушто йочам ончаш налше ача-ава-влак, погынен, тӱрлӧ йодыш шотышто каҥашат. Клубын ик эн чолга участницыже – Морко район Кӱчыкэҥер ялыште илыше, эмлымверыште медшӱжарлан пашам ыштыше Маргарита Георгиевна Гаврилова. Лев Владимирович пелашыж дене коктын вич приёмный йочам ончен куштат.
М.Гаврилова дене клуб, еш да моло нерген мутланенна.
– Маргарита Георгиевна, «Родник» клубда кунамсек пашам ышта?
– Клуб 2017 ий мартыште шочын. А мый тушко 2020 ийыште ушненам. Тунам районысо опеке да попечительстве пӧлка гыч йыҥгыртеныт, Моркышто приёмный еш-влаклан эртаралтше погынымашыш толаш ӱжыныт. Тушто Марий Элысе приёмный еш-влакын «МариЯ» ассоциацийыштын (Авт.– Ӱмаште январьыште пашам ыштымым чарнен) председательже Людмила Владимировна Золотарёва дене палыме лийынам. Лачак тудын чолгалыкшым ужын, приёмный еш-влак нерген чон йӱлен каласкалымыжым колын, шкеат чулымрак лияш шонен пыштенам.
– Кузе вара чолга койыш-шоктышдам ончыкташ тӱҥалында?
–Ончыч тиде мыланна огеш кӱл, калык коклаште уто мут ынже лек манын шоненна, шкенам ончыкташ ӧрынна. А йоча-влак шукынжо ме гына приёмный улына манын шонат. Тыгаяк еш-влак дене, вашлийын, ваш мутланена, тӱрлӧ мероприятийыш пырля коштын, икшыве-шамыч шкет огыл улмыштым умылат.
2020 ий годсек ешна дене тӱрлӧ мероприятийыш, конкурсыш ушнена. Шкенан пример гоч моло ача-ава-шамычымат икшывым ончаш налаш кумылаҥдена.
Чебоксарыште эртаралтше Юл кундем федеральный округысо приёмно-родительский организаций-влакын Погыныштыжо лийынам. Ульяновскышто конференцийыште участвоватленам. Тыгай мероприятийыш коштын, чолга ача-ава-влак дене палыме лийын шулдыраҥынам. Районысо приёмный еш-влаклан ик мессенджерыште группым ыштенам. Эн ончыч тушто 5 еҥ веле лийын. Кызыт районысо опеке да попечительстве пӧлкан пашаеҥже-влак дене пырля 51 еҥ шотлалтеш. Лийшашлык мероприятий, погынымаш нерген ынде группышто пален налына.
– «Родник» клубыш мыняр приёмный еш коштеш?
– Районыштына 43 приёмный ешыште 74 йоча кушкеш, тыгак опекыш налше 24 ешыште 27 йоча воспитатлалтеш.
Клубын членже ситышын улына. Но эн чолган 10 наре еш шкенжым ончыкта. Ава-влак Елена Токарева, Екатерина Семёнова, Антонина Боброва, Эльвира Григорьева, Светлана Михайлова, Наталья Никитина, Елена Ильина, Елена Панина, Лидия Петрова, Наталья Николаева клубын пашашкыже эреак чулымын ушнат.
– Могай пашам клубышто виктарен шогеда?
– Приёмный еш, поснак тулыкеш кодшо йоча-влаклан 2021 ий 5 июньышто «Салам, кеҥеж» пайремым эртаренна. Тылеч вара эре иктаж-кушко лектына, конкурсыш ушнена. Чыла тидым шке окса кӱшеш ыштена, микроавтобусым заказатлен, палемдыме верыш лектын коштына. Республикысе чыла гаяк районым ужмо. Йошкар-Оласе Курчак театрыште спектакльым пырля онченна. Юрино районысо Шереметев замокым ужмо, Шернур районысо Кукнур селаш Марий Йӱштӧ Кугыза деке мийыме. Небережный Челна оласе Дельфинарийыште, Озаҥ оласе зооботсадыште, Кремльыште, Раиф монастырьыште лийме. Камский теҥыз воктене, тылеч посна Сочиште каныме.
Приёмный ава-влак пырля концертыш, семинарыш, тренингыш коштына.
– Приёмный еш-влак могай нелылык дене тӱкнат?
– Йочам ончаш налаш шонышо ача-ава-влаклан кертмем семын полшаш тыршем. Опеке органыш миен толаш темлем. Тушто рашрак чыла умылтарат. Приёмный ешлан Йошкар-Олаште тунемаш кӱлеш. Тунеммашке колташ опеке органыште спискым ыштат.
Кажне ешыште шке нелылык уло. Клубын участникше-влак, погынен, приёмный йочам воспитатлыме шотышто мутланена, опытна дене палдарена. Ме чылан ынде ик еш гай лийынна. Чон ойгынам, куаннам пырля пайлена.
– Маргарита Георгиевна, молан да кунам икымше йочам ончаш налаш шоненда?
– Самырыкем годым Кокласола ял качылан марлан каенам. Кок эргына шочын. Кызыт нуно шкешт ешан улыт. Но пелашем дене ойырленна. Илен толын, Лёвам вашлийынам. Ешым погенна. Чаманен каласыман, Юмо икшывым пуэн огыл, а суртышто йоча юарлыме йӱкым колмо шуэш. Тыге пелашем дене йочам ончаш налаш шонен пыштенна. Кызыт ешыштына вич йоча кушкеш.
2015 ий февральыште 1,8 ияш Вика ӱдырым ончаш налме. Викам садикыш колтымеке, эмлымверыш пашаш лектынам. Декабрьыште эмлымверыштына 1,8 ияш Миша черле киен. Тудым еш гыч поген налме улмаш, родыжо-влакланат кӱлын огыл. Мылам Мишам жаплан шке деке налаш темленыт. Йочам ешыш пуртымеке, поктен от колто вет. Вара тудын куд ияш Алексей изаже улмо нерген пален налынна. Иза-шольым ойырымына шуын огыл. Тунам ийготыш шудымо йоча-влаклан «Журавушка» социально-реабилитационный рӱдерыште улшо Алёшам суртышкына кондышна.
А ӱмаште февральыште опеке деч посна кодшо куд ияш Слава ден вич ияш Настям ешышкына пуртенна. Нунылан республик мучко ешым кычалыныт. Эн ончыч мыланна йыҥгыртеныт, ме келшен огынал. Содыки кум икшыве кушкеш, шкежат огына самырыкешт. А йочам воспитатлаш – кугу ответственность. Марий Турек районышто ешым нунылан муыныт ыле, но кум кече гыч йоча-влак деч отказатлалтыныт. Пӱралтын тугеже эше кок падырашым кушташ манын шоналтышна да ончаш нална.
– Ончаш налме икшывыда-влак могай улыт?
– Кажне йочан – шке койыш-шоктышыжо. Икшыве ласка, чылт эре мутым колыштшо лийын ок керт, шонем. Йоча кушмын кажне этапшым эртышаш. Тыге пӱртӱс йодеш. Чулым улыт. Пырля погынен, пашам ыштена, пӱртӱс лоҥгаште канена, кол кучаш коштына. Ешыште марла мутланена. Ӱдыр-влак мылам полышкалат, эрге-шамыч ачашт пелен улыт. Сурт кӧргыштӧ иктым, весым тӧрлаташ тунемыт.
– Ача-авашт йочаштым пӧртылташ шонат гын, те тореш огыда лий?
– Ешыштына кушшо йоча-влак приёмный улмышт нерген палат. Туге гынат
мемнам ача ден ава маныт. Тидлан куанена веле. Ачашт ден авашт тӧрланат, пашам ыштат, кӱлеш воспитанийым пуэн кертыт гын, ме торешланаш огына тӱҥал. Южгунам иктаж-кӧжын ачаже але аваже телефон дене йыҥгырта, но йоча-влак нунын дене кылым ынешт ыште, нелеш чот налыныт, очыни.
Йоча – илышын пеледышыже манын ойлат. Тудым ме, кугыеҥ, чинче падыраш гай осал деч аралышаш, илышыште пеҥгыдын шогаш туныктышаш улына. Чаманаш логалеш, чылан огыл тидым шуктен кертеш. А орлана титакдыме колой. Маргарита да Лев Гавриловмыт гай еҥ-влак шукырак лийыт гын, мыняр йоча пиалан, ача-аван йӧратымашыжым, чон шокшыжым шижын кушкеш?!
Еш альбом гыч налме фото-влак.