Редакцийышкына ойган увер пурен: 17 апрельыште поро кумылан, артист койышан, мураш йӧратыше Валерий Викторович Александровын ӱмыржӧ кӱрылтын.
Тудо тыгак шукылан спортсмен семын палыме, шуко жап физкультур туныктышылан ыштен, йоча-влакым таза кап-кылан, пеҥгыде лияш кумылаҥден.
Тыгодымак тудо марий калыкын тӱвыра поянлыкшым аралаш полшышо айдеме семын мыланна шерге. «Кугарня» газет редакцийын эртарыме мероприятийыштыже кумылын выступатлен, «Какшан сер ӱмбалне» авторский муро фестивальыште гитар сем почеш муралтымыж дене сеҥыше радамыштат лийын ыле.
В.В.Александровын ӱмыр лугыч лиймыжлан кӧра ойганена да «Кугарня» газет редакций лӱм дене ешыжлан, лишыл родо-тукымжылан шке чаманымашнам каласена.
