Морко район Шӱргыял школын туныктышо ден тунемшыже-влак Кораксола тӱвыра пӧрт пеленысе «Муро кумыл» фольклор ансамбльын чолга участницышт дене пырля Сеҥымаш кечым рӱж палемден колтышна.
1418 кече да йӱд шуйнышо Кугу Ачамланде сар историйыштына пеш кугу кышам коден. Шучко сар тӱжем дене ешыш ойгым, шинчавӱдым конден. А мыняр еҥын тушан ӱмыржӧ лугыч лийын, мыняр ӱдырамаш тулыкеш кодын, йочам ончен, йӱдшӧ-кечыже пасу пашаште, заводлаште тыршен, сӧй мландыште илаш-колаш кредалше-влаклан кочкышым колтен. Нунак чодырам руымаште, шолым волтымаште тыршеныт.
Республикна гыч гына 140 тӱжем наре але тыште илыше кажне нылымше еҥ фронтыш каен. Нунын коклаште 3587 ӱдырамаш лийын. Сар гыч 98 ӱдырамаш пӧртылын огыл. Марий кундемеш шочын-кушшо нылле утла еҥлан Совет Ушем Герой лӱмым пуымо.
Мемнан Кинер кундем гыч 710 еҥ сарыш каен, тушечын шукынжо пиалан илыш верч шке вуйыштым пыштеныт. Нунын подвигышт нигунам огеш мондалт. Самырык тукым да Кинер кундемыштына илыше калык сӧйыштӧ вуйыштым пыштыше салтак-влакын сай пашаштым ынышт мондо манын, кажне ийын обелиск воктене кугу мероприятийым эртарена. Тунемше-влак мурым мурат, почеламутым лудыт, туныктышо-шамыч йочам ончылгоч ямдылат, а «Муро кумыл» ансамбль «Кочамын садерже» муро дене пайремым почеш да шочмо мландылан пӧлеклалтше мурйолваж дене митингым мучашла. Лач тыге ме чылан пырля ик ой дене самырык тукымым шуарен толына. Вет келшен ыштыме паша гына сай лектышым пуа да умбакыжат виянрак тыршаш кумылаҥда.
Елена Григорьева, Шӱргыял школын вожатыйже да Кораксола тӱвыра пӧртым вуйлатыше.
Снимкыште: Сеҥымаш кечым палемдыме годым.
