23 ноябрьыште Москошто эскерыше-влакын всероссийский конгрессышт эртен. Тудын пашашкыже Марий Эл гыч общественник-влак ушненыт.
Чумыр мероприятий элнан 89 регионжо гыч 700 наре еҥым чумырен. Мероприятий нунылан опытым вашталташ, профессионал моштымашыштым нӧлташ да 2026 ийысе сайлымаш тургымлан ямдылалташ йӧным ыштен. Тидын нерген тг-каналыштыже РФ Мер палатын еҥже да Марий Элысе Мер палатын Председательжын алмаштышыже, «За Марий Эл» суапле фондын директоржо Роман Золотухин увертарен.
Секций-влакын пашаштым иктешлымеке, идей-влакын презентацийышт эртен. Ты шотышто «Эскерышын кечыжым» пурташ, шке пашашкыже искусственный интеллектым шыҥдараш да российысе вӱдышӧ вуз-влак дене партнёрствым вияҥдаш темлыме.
Эскерыше-влакын всероссийский Конгрессыштым Президент грант фондын полшымыж дене «Корпус «За чистые выборы» мер толкын эртарен.
Р.Золотухинын тг-каналже гыч фото.