Ынде ныл ий почела ноябрьыште Марий самырык театрын артистше-влак Москошко «Школьная классика» фестивальышке коштыт.
Тений Иван Гончаровын «Обломов» романже почеш шындыме «Обломов. Теперь или никогда» спектакльым ончыктышт. Ты спектакльым актёр-влак ик кечыште эсогыл кок гана модыныт. Нуным Москошто тунемше-влак кок ганажат кужу жап совым кырен вашлийыныт.
Обломовын рольжым Марий Элын сулло артистше Александр Кожевников мастарын келыштарен да ончышо-влак деч кугу аклымашым сулен. А спектакль деч вара зритель дене оҥай вашлиймаш эртаралтын. Тушто «Обломов» роман, спектакль да театр нерген мутланымаш тарванен. Тидыже Москосо тунемше ден марий артист-влакланат поро шарнымашым коден.
Кастене Марий самырык театрын артистше-влак Москошто илыше марий родына-влаклан кумылым нӧлтышӧ концертым пӧлекленыт. Тушко погынышо землякна-влак марий артист-шамыч дене пырля муро-куштымаш гоч пуйто шочмо мландын ю аланышкыже миен коштыныт.
Снимкылаште: Марий самырык театрын артистше-влак – Моско сценыште; Москошто илыше марий родына-влак дене вашлиймаш годым.
Фотом театрын архивше гыч налме.
Фото файл – Моско сценыште, Марий землячестве дене вашлиймаш.