Коштымо лышташым гипертоний чер, шолын пашаже пужлымо, гиповитаминоз, кылмен черланыме годым чай семын шолтен йӱыт, а свежа лышташым салатыш але вес кочкышыш петрушко але укроп олмеш пышташ лиеш.
Лышташан лемым йыжыҥ чер годым йӱыт. Ик стакан вӱдыш ик кугу совла лышташым пыштыман да лу минут шолтыман, пел стакан дене кечеш кок гана йӱман.
Гиповитаминоз годым ик стакан шокшо вӱдлан вич грамм коштымо лышташым налман.
Пагарын да шолын пашашт пужлымо годым лышташ да саска дене чайым шолтен йӱаш сай. Тудо вӱргорнышто тромб лийме ваштарешат кучедалеш.
Коваште чер годым укш да лышташ вӱдан ванныште кияш пайдале.
Кылмен черланымеке, облепихе лышташым, висвис пеледышым да вӱршудым икнаре налман да чайым шолтен йӱман.
Облепихе лышташан чай стоматитым да периодонтитым эмлыме, сакыр диабет, анемий, пагар йора, мокш чер, атеросклероз да гипертоний, уда холестерин шуко улмо, ӧрдымӧ годым пайдале.