Декабрь кыдалне документовед да архивовед лияш ямдылалтше 20 ияш студент Егор Кудрявцев шке командыж дене оҥай да кӱлешан проектым Ханты-Мансийск олаште арален. Ты пашам жюри икымше вер дене палемден.
Мо нерген проект?
Рвезе-влак (а тиде Фирдус Гайнутдинов, Михаил Белков, Олег Кутергин, Роман Брылёв) телефон да компьютер дене пайдаланыме годым шинчам аралыше приложенийым ямдыленыт. Ты пашам Егор Кудрявцев вуйлатен.
«Вузыштына «Проектный паша» дисциплине уло. Пырля тунемше-влак дене пырля ты проектым ӱмаште ыштенна ыле. Тушто кажныже шке сомылжым шуктен. А аралаш Рома дене миенна, вет тудо программист. Чаманен каласыман, тыгай приложенийым ышташ кызытеш оксам монь ойырымо огыл. Но ӱшан ила: иктаж-кунам шинчам аралаш полшышо приложенийна чынжымак лиеш», – мане Егор.
Вич шочшан еш гыч
Е.Кудрявцев Волжский район Мучашъер ялыште шуко шочшан ешыште шочын. Екатерина Арсентьевна ден Алексей Леонидович Кудрявцевмыт республикын чапшым ятыр еш конкурсышто араленыт да сеҥышыш лектыныт. Тыште ача-ава шке шочшыштым марий тӱвыралан да йӱлалан кертмышт семынак кумылаҥдат. Егор нуным лыжган «ачий» да «авий» манын лӱмда. Тидыжат кызытсе жапыште путырак шерге.
Марий рвезе школыштат сайын тунемаш тыршен, тӱрлӧ олимпиадыш коштын. Ик жап фокус-влакым ончыктылын, сценылаштат выступатлен. Варажым МарГУ-н йот йылме-влак факультетышкыже пурен. Но тушто нелыла чучын, сандене варажым вес специальность дене шинчымашым налме группыш куснен. Кызыт – кумшо курсышто.
Яра жапыштыже Егор Ютьуб полшымо дене пианиным шокташ тунемеш. Тыгак вузышто икымше курс годсекак волейбол дене модаш коштеш. Командышт турнирлаште сеҥыше радамышкат лектеш.
Ончыкылык документовед ден архивовед лияш шонымаш дене ты группышто 16 ӱдыр-рвезе тунемеш. Егорлан документ дене пашам ышташ келша. Кодшо ийын практикыште тудо Шуко функциян студенческий рӱдерыште студент-влакын делаштым чумыркален. Теният ты рӱдерыш логалаш шона.