НЕЛЛИ
Таче Пошкырт кундем Мишкан район Пӧкеленде ялыште шочшо, а кызыт Пӱрӧ олаште илыше Нелли Байназова дене палымым ыштена. Тудо амалкалче семын тырша, Чорай селаште «Алёна» кевытышт уло.
– Мылам авам тыгай лӱмым пуэн. Уфа олаште тудын Нелли йолташ ӱдыржӧ илен. Ковам-влаклан ты лӱмым ойлаш неле лийын, садлан нуно Лена маныныт. Тыге кок лӱман улам. Изиэм годым шонем ыле: молан мыйын лӱмем моло деч ойыртемалтеш? Ынде кугемын шуынамат, пеш йывыртем, мыланем шке лӱмем чот келша. Куанем, кунам шочмо лӱмем дене ойлат. Тиде такшым грек лӱм да волгыдо, кечан улмым ончыкта, маныт, – ойла Нелли.
Яра жапше годым Н.Байназова «Эрвий» ансамбльыш коштеш. Тудо Бирск оласе Марий-влакын калыкле-тӱвыра автономийышт пелен 2022 ий июньышто шочын. Ты ийынак коллективым вуйлаташ тӱҥалын.
Нелли Николаевна ден Вадим Александрович 25 ий пырля келшен илат. Кум икшывышт уло. Мо оҥайже: Неллин кок коважат марий лӱман лийыныт. Ачажын аваже Пайрай улмаш, аважын – Меҥас, а пелашыжын коваже – Леня. Кызыт тыгай лӱмжым шагал вашлият.