Лач тыге кусаралтеш англичан йылме гыч МарГУ-со «Gentle Сrew» куштышо командын лӱмжӧ.
«Тыге кусаралтеш гынат, ме тудым шке семынна умылена: куштымаш сымыктышыште твоспитатлыше, стильный, эпле лийже да джентльмен образ семынак шке стильже дене ойыртемалтше манын, тыге лӱмденна», – мане вуйлатышыже К.Ю.Усов.
Ты командым МарГУ-што вич ий ончыч самырык хореограф-постановщик Константин Усов чумырен, шкеак лӱмым пуэн, а студент-влак тиддене келшеныт. Кажне ийын тышке МарГУ-н тӱрлӧ факультетыштыже да курсыштыжо тунемше 18-30 студент коштеш.
Командын направленийже – уремысе куштымаш. Чолга ӱдыр-рвезе-влак Hip-Hop, House, Dancehall, Experimental стильла дене куштат. Тыгак нуно авторский хореографий денат пайдаланат, тӱрлӧ стильым ушен, куштымаш-влакым шонен луктыт.
«Gentle Сrew» командым МарГУ-со чыла гаяк мероприятийыште ужаш лиеш. Тыгак тудо Йошкар-Ола ден республикынат чапыштым арала. Вич ийыште рӱдолаштына, Чебоксарыште, Москошто эртаралтше Российысе фестиваль ден конкурслаште лауреат да призёр лийын. Йошкар-Олаштына Сеҥымашын ХХХ идалыкше лӱмеш тӱвыра полатыште эртарыме «Рэп-территория» фестиваль-конкурсышко 2018 ий годсек ушна.
Шукерте огыл команде кугу сеҥымашыш шуын – 2021 ийысе «Опора республики» премийын лауреатше лӱмым сулен, «Идалыкын командыже» номинацийыште сеҥен. А тылеч ончыч Озаҥышке «Art-перспектива» тӱнямбал конкурсыш, Чебоксарыште лийше «Puzzle Fest» йоча да самырык усталыкын всероссийский фестивальышкышт миен коштын.
Эн оҥай номерыштлан куштызо-влак мини-спектакль-шамычым шотлат. 2019 ийыште МарГУ-што отчётный концертыште «Просто о важном» выступленийым ончыктеныт. А 2022 ийыште студент-влакын икымше командышт вузын сценыштыже оҥай мини-спектакльым темлен. Лач нине тунемше-шамыч тӱҥалтыш гыч мучаш марте «Gentle Сrew» командыште лийыныт.
Теният командын илышыже тӱрлӧ выступленийлан поян. Ӱдыр-рвезе-шамыч «Российысе студент шошо» фестивальын регионысо этапыштыже, «Иди танцуй» тӱнямбалысе конкурсышто (Озаҥ), «Russian Dance Project 818» Российысе урем тӱвыра фестивальыште (Моско), «iВолга» молодёжный форумышто мастарлыкыштым ончыктеныт.
Кажне ийын «Gentle Сrew» шке тӱшкашкыже у еҥ-влакым уша. Теният сентябрьыште студент-шамыч толыт манын ӱшана.
«Мый чылаже индеш куштызо командым куштенам, кызыт кок тӱшка дене заниматлем. Тушко 10-12 ияш йоча-влак ден 18 ияш деч кугурак еҥ-влак коштыт. Куштымаш баттллаште сольно да команде дене икмыняр наградына уло. А шкеже ынде 26 ий куштем, хореограф семын латнылымше ий туныктем. «Station Dance Hub» современный хореографий студийын вич отчётный концертшым шынденам, куд оласе конкурсым да баттлым организоватленам», – каласкалыш шкеж нерген Константин Усов.
Куштышо-влакын командышт, чынжымак, моло деч ойыртемалтше, кумылым нӧлтен моштышо да шыргыжалаш таратыше, вет кажне номерыште драйв шижалтеш – куштышо-влак тудым шкештат шижыт да ончышыланат намиен шуктат. Куштымаш тыгаяк лийшаш!