«Ший памаш. Йоча-влак» фестиваль-конкурсышто тений Мария Бердникова дене палыме лийым. Ӱдыр Алена Яковлеван «Нелеш ит нал, авай» мурыж дене сценыш лектын да ятыр еҥын кумылжым савырен.
«Изи ӱдыр» гыч тӱҥалын
Мария – Кужэҥер район Кӱшыл Нольдӱр ял гыч. Йӱледӱр школышто индеш классым тунем лекмеке, МарГУ-со калыкле тӱвыра да тӱвыра кокласе коммуникаций институтын студенткыже лийын. Эстрадын музыкальный искусствыжо направлений дене икымше курсышто шинчымашым пога.
– Мо шкем шарнем, эре мураш йӧратем. Йошкар-Олаш тунемаш кайымешкем, Кугу Лаждӱр тӱвыра полатыш мураш коштынам. «Лӱҥгалтыш» студийын еҥжылан кызытат шотлалтам. Кугу Лаждӱр тӱвыра полатым вуйлатыше Анатолий Захарович Градов мастарлыкем эн ончыч шекланен да музык тӱняш корным почаш полшен.
Икымше гана сценыш лекмем кызытат сайын шарнем. Кокымшо классыште тунемам ыле, «Изи ӱдыр» мурым муренам. Кызытат тӱрлӧ мероприятийыш ушнаш тыршем. Сценыш лекме деч ончыч, конешне, тургыжланымаш авалта. Но ындыже тудым сеҥаш тунемынам, манаш лиеш, – ойла М.Бердникова.
Муро шотышто ойыркалымаш уке, манын палемда Мария, тудлан чылажат келша. Тӱҥжӧ – мурым калыклан намиен шуктыман: веселамат, шӱлыканымат. А тидланже сценыш лекше еҥ мурым шке шӱм-чонжо гоч колтышаш.
Весела студент пагыт
Кызыт Мария весела студент пагытлан куанен ила. Тунемме ий тӱҥалын веле гынат, пырля тунемше-влак коклаште йолташ-шамычымат муын шуктен.
– Ик могырым ончалаш гын, коклан нелылыкат лектеш: вет мый, ача-ава пелен мӧҥгыштӧ илен тунемше, Йошкар-Олаш толынам да еш деч ӧрдыжтӧ илаш тунемынам. Вес могырым студент жап – моткоч весела да оҥай пагыт. Теве шукерте огыл «Голос юности» конкурс мероприятий-влак эртаралтыч. Тушко мыят ушненам: рушла муренам да музыкальный театрыште модынам, – каласкала ӱдыр.
Тунеммылан шуко жапым ойырыман гынат, яра лиймыж годым Мария книгам кучен шинчеш. Шочмо ялышкыже миен толын, вий-куатым пога. Ончыкыжым Мария Бердникова профессионал мурызо лийнеже. Тек шонымет семын лиеш, поро марий ӱдыр!
Авторын фотожо.