Шукерте огыл ик соцкылыште у марий муро лекме нерген уверым ужым. «Курымешлан» маналтеш, Ксения Беляева мура. Мурым колыштмеке, ныжыл йӱкан ӱдыр дене палыме лияш кумыл лекте.
– Тиде икымше мурем. Мурылан мутым Христина Александрова возен. Тудын возымо почеламутшо-влакым ончычат лудынам, пеш келшат. Христиналан мурым сценыш лукташ кумылем нерген ойленам, мо нерген мурынем, умылтаренам. Семым Виктор Апталиков келыштарен. Тыге «Курымешлан» муро шочын. Тиде пелашемлан сӱан кечыналан пӧлек, икте-весым вашлиймылан, умылен да йӧратен илымылан таумут. Ешым чумырымыналан шукерте огыл ик ий теме. Мурым ямдылымем, возымем нерген пелашем пален огыл, пайрем кечын икымше гана колын, – манеш К.Беляева. – Владислав – поро кумылан, шке мутшым кучышо айдеме, весылан полыш кидым шуяш эре ямде. Мыйымат ача-авам тыгай лияш туныктеныт. Сӱаннам Владислав ден марий сынаным эртараш кутырен келшенна ыле. Тидлан лӱмын марий тувырым ургыктенам, пелашемынат вургемыштыже марий тӱр лийын.
Ксения Беляева – Башкортостан Республикысе Краснокам район Маняк ялын ӱдыржӧ. Кызыт И.С.Палантай лӱмеш тӱвыра да сымыктыш колледжыште тунемеш, нылымше курсыш вончен.
Ӱдыр изиж годсек мура. Тудын кок коважат мураш уста лийыныт. Изи улмыж годымак Ксения пайремлаште выступатлен. Варажым школысо, районысо мероприятий-влак годым сценыш лектын. Шым классым Ксения шке ялысе школышто тунемын, вара пошкудо Пураялыш коштын.
– Школышто тунеммем годымак Марий Элыш тунемаш каяш шоненам. Кугурак класслаште врач профессий келшен, медуниверситетыш тунемаш кайынем ыле. Но шонымашем пытартыш жапыште вашталтенам. Марий Эл гыч артист-влак концерт дене толыт да ӱдыр-рвезе-влаклан «Мемнан деке тунемаш мийыза» маныт ыле. Тыге мыят марий кундемыш тунемаш толынам, – манеш К.Беляева.
Документшым ӱдыр И.С.Палантай лӱмеш тӱвыра да сымыктыш колледжын хоровой пӧлкашкыже пуэн. Ача-аваже ӱдырыштын ойырен налме корныжлан тореш лийын огытыл. Ксениян документым пуаш, экзаменым сдатлаш Йошкар-Олаш толмыж годымат пырля лийыныт.
– Тунемаш куанен коштам. Преподаватель-влак пеш сай улыт, кунам кӱлеш, эре полшат. Вокал дене занятий пеш келша. Колледжыште фортепьяно, гармонь дене шокташ тунемынам. Ончыкыжым гитар дене шокташ тунемнем. Мурымо мастарлыкым тергыше тӱрлӧ конкурсыш ушнем, — ойла Ксения.
Тунемме деч вара студентке преподаватель-влак дек ешартыш занятийлаш коштеш. Ксения тыгак Я.Эшпай лӱмеш Марий кугыжаныш филармонийын «Эреҥер» калык муро ансамбльыштыже мура.
Шочмо кундемышкыже Ксения кеҥеж каникуллан гына миен толеш. Шочмо пыжаш деч тораште лиймыжлан ончыч пеш йокрокланен. А кызыт пырля тунемме ӱдыр-рвезе-влак коклаште ятыр йолташым муын. Каныш кечылан Владиславын шочмо ялышкыже, Оршанке район Изи Ӧршашке, кудалыт.
Колледжым тунем пытарымеке, Ксения кӱшыл шинчымашым налаш шона – МарГУ-ш туныктышылан тунемаш пурынеже. Ончыкыжым эше у муро-влакым лукнеже.
Ксения тыгак сӱретлаш йӧрата, эше школышто тунеммыж годымак тудлан пырдыжгазетым сӱретлаш ӱшанен пуэныт. Кызытат ӱдыр, яра жапше лиеш гын, кидешыже кистычкым куча. Сӱретлен шинчымыж годым чон ласкалык толеш, вуйыш у шонымаш-влак пурат.
Авторын фотожо.