Волжский район Ӱлыл Азъял гыч Татьяна Краснова изинек чулым кушкын. Школыштат, варажым университетыштат тунеммыж годым тӱрлӧ мероприятийыш ушнен, спорт таҥасымашлаште шкенжым терген. Дипломым налмеке, ӱдыр ик жап школышто туныктен. А кызыт тудо Волжск оласе ик йочасадыште – воспитатель.
Лудаш да шотлаш шкеак тунемын
Татьяна ныл шочшан ешыште кушкын. Изи капан улмыжлан кӧра тудым йочасадыш колтен огытыл, вет тушко ик меҥге чоло пасу гоч ошкылман улмаш. Лудаш да шотлаш изаже-акаж почеш шкеак тунемын. Ончыч ӱдыр Кӱшыл Азъял, вара Пӧтъял школыш коштын. Сайын тунемын. Спортлан икымше класс гычак шӱман. Урок деч вара спорт секцийлаш вашкен: шошым-шыжым куржталын, телым ече дене коштын. Куштылго атлетике да ече дене таҥасымашлаште эре гаяк ончыл верыш лектын.
А кастене ача-аваже да шӱжарже дене пырля ялысе клубыш вашкен. Тушто марла мурен-куштеныт, спектакльым шынденыт, пошкудо яллаш концерт дене коштыныт.
– Сӱретлаш йӧратем. Школышто тӱрлӧ пайремлан пырдыжгазетым ямдылаш мыланем эре ӱшанат ыле. «Идалыкын тунемшыже» конкурс кажне ийын эртаралтеш ыле, тушто кажне гана сеҥыше-влак радамыш логалынам. 8-ше класс гыч марий йылме да литератур, руш йылме да литератур, ИКН предметла дене районысо олимпиадыште школын чапшым араленам. А 10-шо классыште марий литератур дене республикысе олимпиадыште кокымшо верым, вес ийынже кумшо верым налынам. Регион-влак кокласе этапыште кокымшо лийынам. Тидлан туныктышем Нина Павловна Синичкиналан тауштем. Тудо шочмо йылмым эше чот йӧраташ, тудын дене кугешнаш туныктен, – каласкала Т.Краснова.
Йӧратыме воспитатель
Школ деч вара ӱдыр МарГУ-н студенткыже лийын, Финноугроведений институтын марий-англичан пӧлкаштыже тунемын. «Мурсем» ансамбльыш коштын. Конференцийлаш, спорт таҥасымашлаш ушнен.
Университетым йошкар диплом дене тунем пытарымеке, шке районысо Учимсола школышто Татьяна Николаевна марий да англичан йылме-влакым туныкташ тӱҥалын. Самырык туныктышылан 6-шо классым ӱшанен пуэныт. А 2015 ий гыч тудо Волжск оласе «Берёзка» йочасадыште воспитательлан тырша.
– Ӧрдыж гыч ончымаште воспитательын пашаже неле огыл манын шоналташ лиеш. Но тиде тыге огыл. Ме йочалан ныжыл ава, тунамак поро йолташ, шуко палыше туныктышо-наставник лийшаш улына. Тылеч ончыч йочасадыште марий тӱня дене палдарыше кружокым кум ий вӱденам, икшыве-влаклан марий калыкын фольклоржо, илыш-йӱлаже, пайремже-влак нерген каласкаленам. Ты пашам чон йодмо почеш шуктем. Кажне кечын, пашаш толын, мый ужам: икшыве-влак ӱшанат, мыйым пагалат. Мый нуным йӧратем, нунынат йӧратымашыштым шижам. Ача-ава-влак денат кылым вашке муам, – манеш Т.Краснова.
Татьяна Николаевна йочасадыште англичан йылме дене кружокымат вӱда. Икшыве-влак модмо семын у йылмым кумылын тунемыт, кружокыш куанен коштыт да сай лектыш дене куандарат.
Пидеш, сӱретла
Профессийлан шуко жапым ойырыман гынат, Татьяна шке йӧратыме сомылланат жапым муашак тырша. Тудо крючок дене пидеш, сӱретла. Тыгак окна ончылно тӱрлӧ мотор кушкылым кушта, кеҥежым пакчашкыжат ойыртемалтше пеледыш-влакым шында.
Т.Краснован альбомжо гыч налме фото.