Ӱмаште 21-22 сентябрьыште республикысе да районласе Молодёжный парламент-влакын нылымше созывышт чумырген. Тушеч 17 еҥже – районласе Молодёжный парламентын председательышт. А вес 17 еҥже – тӱрлӧ партий ден мер организаций-влакын чолга еҥышт. Лач нине 34 еҥ Республикысе Молодёжный парламентым ыштат.
Мо тугай молодёжный парламент? Могай пашам тудо шукта? Нине йодышлан молодёжный парламентын нылымше созавшын председательже Матвей Галяутдинов вашештен.
– Матвей, Молодёжный парламент могай пашам шукта?
– Молодёжный парламент – кугыжаныш собраний пеленысе консультативно-совещательный орган. Регионысо молодёжный политикым реализоватлыме пашан ик формыжо. Утларакшым мер пашам шукта. Тӱрлӧ проект-влакым шонена, нуным илышыш шыҥдараш полшена. Тылеч посна парламентын кажне еҥже кугыжаныш собранийын депутатше-влаклан полышкала. Тӱрлӧ мероприятийлаште, приёмлаште лиеда. Полышкалыше лияш заявленийым возымо, кызыт кӧ могай депутат дене пашам ышташ тӱҥалеш, спискым ыштена.
– Ала иктаж проектымат ямдылен шуктенда?
– Шукерте огыл регионыштына электрон тамакым, тудлан жидкостьым ужалымым чарыме проектым приниматлыме. Ме республикыште нуным ужалыме вер-влакым мумо шотышто мониторингым эртаренна. 20 декабрь гыч тӱҥалын таче кече марте 30 наре тыгай верым муынна. Молодёжный парламентыш пурышо ӱдыр-рвезе-влак тушко миен, тиде законопроект нерген ужалышылан ойленыт. Умбакыжат тидын шотышто паша каяш тӱҥалеш гын, ме кушто ужалымым, кӧ конден шогымым палаш тӱҥалына.
Кокымшо проектым МЭТР телеканал дене пырля ыштена. «Летопись героев» маналтеш. Кажне районышто видеосюжет-влакым войзена. Тушто самырык ӱдыр-рвезе-влак сарыште лийше коча-ковашт нерген каласкалат.
– Молодёжный парламентыште улшо еҥ-влак дене чӱчкыдын погынеда?
– У созывын икымше заседанийже декабрьыште лийын. Тылзылан ик гана сессийым эртарена.
– Могай ийготан еҥ-влак молодёжный парламентыш логал кертыт? Тушко логалаш манын, мом ыштыман?
– Мемнан деке 16 гыч 30 ий марте чолга, ончыкылык нерген шонышо, инициативный еҥ логал кертеш. Молодёжный парламент нерген шукын палат, сандене мемнан деке логалаш йодмаш шуко пура. Нылымше созывым ме тӱрыснек уэмденна. Ондакысе участник-влак кокла гыч мый гына кодынам.
Мутат уке, чыла кандидат-влакым ме налын огына керт, сандене резервым ыштенна. Тыгай ӱдыр-рвезе-влак парламент гыч шке кумылын кайыше еҥ-влакым алмаштен кертыт. Нунын дене эше ик проект ямдылалтеш. Резервыш логалше-влак коклаште конкурсым увертарена. Сеҥыше-влак Дублёрын кечыштыже участвоватлаш тӱҥалыт. Нуно ик кечылан районлаште администрацийым вуйлатыше лийыт.
– Созывым мыняр ийлан погеда?
– Районлаште самырык-влак тӱрлӧ амаллан кӧра чӱчкыдын вес вере илаш куснат. Еш, йоча, паша верым вашталтымаш, армий – чыла тидыже парламент гыч каяш амалым ышта. Нылымше созывым кок ият пелылан чумырымо. Тылеч ончыч вич ий лийын.
Молодёжный парламентын икмяняр комитетше уло. Нуно предпринимательстве, социальный, спортивный направлений дене пашам ыштат.