Россий Правительствын Председательже Михаил Мишустин республик-влакым социально-экономически вияҥдыме индивидуальный программым ныл регионышто шыҥдарыме шотышто пунчалым пеҥгыдемден. Ты радамыш Марий Элат логалын.
Михаил Мишустин увертарен: кажне программылан федеральный бюджет гыч 6 млрд теҥге дене ойыралтеш. Тудым калыкын илышыжым саемдымылан да инвестицийым кондымо регионысо проект, обрабатыватлыме промышленностьым, ялозанлыкым, инфраструктурым, туризмым тӱзаташ да моло сферыланат кучылташ лиеш.
Федеральный Собранийлан 2024 ийысе посланийым иктешлыме почеш Россий Президент Владимир Путин социально-экономический вияҥме шотышто ӱлыл радамыште улшо 10 кундемлан тыгай программым 2025-2030 ийлан ышташ кӱштен.
Марий Элысе у программыште вич мероприятий палемдалтын. Тудо ялозанлыклан, промышленность ден туризмлан полшаш виктаралтын. Программым шыҥдарымаш республикыш 8,1 млрд теҥге наре инвестицийым кондышаш, 905 паша верым ыштышаш да чыла кӱкшытысӧ бюджетыш 5,2 млрд теҥгем колтышаш.