Инвалид икшывым ончышо ача-ава, опекун да попечитель-влак закон почеш тылзеш ныл ешартыш каныш кечым налын сеҥат.
Россий Социальный фондын Марий Элысе пӧлкаже тений идалык тӱҥалтыш гыч 4285 тыгай каныш кечылан 12,8 млн утла теҥгем тӱлен.
Ешартыш канышым налаш манын, пашам пуышо еҥлан (работодатель) йодмашым возыман. Кече-влакым иканаште але тылзе мучко тӱрлӧ жапыште налаш лиеш. Тудын дене ача але ава, але коктынат пайдаланен кертыт.
Тений сентябрь гыч ача-ава-влаклан эше ик йӧн пуалтын: икшывым ончымылан кучылтдымо каныш кече-влак дене пайдаланаш да 24 кече марте, йоча дене шинчаш манын, отпускыш каяш лиеш. Тыгодым могай жапыште канаш тӱҥалме шотышто пашам пуышо еҥ дене каҥашыман, вара кадр пӧлкашке йодмашым возыман. Палемдыман: ондак ача-ава-влаклан тыгай йӧн пуалтын огыл, молан манаш гын кучылтдымо кече-влак йомыныт.
Тӱлыман, тӱлыдымӧ, икшывым 3 ий марте ончымо отпуск-влак годым ача-авалан тыгай ешартыш каныш огеш пуалт.