Марий Элыште «Идалыкын ешыже» республикысе конкурсым иктешлыме. Тудым еш йӱлам, поянлыкым, еш ден йоча жапым аралымылан да калык коклаште шаркалымылан виктарыме. Тений куд номинацийыште сеҥыше-влакым ойыреныт. «Ялысе еш» номинацийыште Марий Турек район гыч Насыровмыт еш ойыртемалтын.
15 ий йӧратен да пагален
Гульнара ден Марсель 2010 ий 31 июльышто ешаҥыныт, а тылеч ончыч 3 апрельыште ислам вера почеш ӱдыр-каче коклаште никахым ыштеныт. Гульнара – Йошкар-Олаште шочын-кушшо ӱдыр, пелашыже – Марий Турек посёлко гыч. Нуно МВД-ыш пашаш пурымо деч ончыч тунеммашым эртыме годым палыме лийыныт. Самырык рвезе вигак Гульнарам ойырен, тудын деке шке чоншижмашым шылтен огыл, тидын нерген тӱрлӧ семын шижтарен.
– Пелашем поро кумылан, тӱткӧ, моткочак ныжылге, сай. Тидланак кӧра ӱдыр чонем савырен. Ынде ятыр ий вате-марий семын илена гынат, койышыж дене нимынярат вашталтын огыл. Ешыштына чылажымат пырля шуктена: тидым тый ыштышаш улат, а тудым мый манын, ойыркалымаш уке, – каласкала Гульнара.
Сылнылыклан шӱман икшыве-влак
Насыровмыт ешыште ныл икшыве кушкеш. Икымше ӱдырышт Гузель 14 ияш. Тудо Нартас школын кадет классыштыже тунемеш. Баскетбол дене вич ий наре заниматла. Спортын ты видыштыже сай лектышым ончыктымыжлан шукерте огыл «Орлёнок» рӱдерыште канен толын. Гузель тыгак Марий Турек посёлкысо Йоча сымыктыш школын баян да фортепиано пӧлкажым тунем пытарен. Школышто «визытанлан» веле тунемеш.
Амира – кокымшо йоча. Тудлан 12 ий. Ӱдыр Нартас школын юнармеец-влак классыштыже шинчымашым пога. Акаже семынак посёлкысо Йоча сымыктыш школын хореографий пӧлкажым тунем лектын. Шахмат да волейбол дене заниматла, школышто сайын тунемеш. Тӱрлӧ таҥасымаште вийжым терга. Кумшо ӱдыр – Ильвина. Тений гыч посёлкысо кадет классыште тунемаш тӱҥалеш. Акажет-влак семынак Йоча да сымыктыш школын хореографий пӧлкаштыже мастарлыкшым тапта. Ӱдыр сылне йӱкшӧ дене ойыртемалтеш.
Адель – вучымо эрге. Рвезе тений икымше классыш кая. Кокымшо ий футбол дене модаш коштеш. Мураш, почеламутым сылнын лудаш мастар. Тудат Йоча да сымыктыш школын баян пӧлкаштыже шинчымашыжым нӧлташ тӱҥалеш.
Аван ойлымыж почеш, икшыве-шамыч сымыктышлан шӱман улыт. Нунын мӧҥгыштышт тӱрлӧ семӱзгар аралалтеш. Тыгак спорт дене пеҥгыде кылым кучат. Таза илыш-йӱлам шуктымаш – ешын ик эн йӧратыме сомылжо.
Йоча-влак пелен лиймылан нимо огеш шу
Шуко икшыван улат гын, кажныжлан тӱткышым ойырыман, чын илыш корныш шогалтыман. Ты амал дене 2021 ийыште Гульнара, МВД пашам коден, йоча-шамычым воспитатлымылан вуйынак пижын.
– Структурышто пашам ыштыше-влак, очыни, умылат. Ты сомыллан, чынжымак, шуко вий да жап кӱлыт. Садланак йоча-шамыч пелен лияш шоненам да паша гыч каенам. Кызыт кокымшо профессионал шинчымашем почеш «Ромашка» йочасадыште физкультурым вӱдем. 2022 ийыште пелашем дене Оршанке посёлкысо шуко профилян училищыште физкультурым туныктышылан тунемын лектынна. Йоча-шамыч дене пашам ышташ моткоч келша.
Пелашем – военный пенсийыште. Тыгак Марий Турек районысо администрацийыште советниклан тырша. Яра жапыштыже футболла модаш йӧрата. Тидлан йоча-шамычымат кумылаҥда, – каласкала Гульнара.
Конкурс ончыко каяш полша
Конкурс нерген пален налмеке, Насыровмыт эн ончыч «Шуко шочшан еш» номинацийыште шкеныштым терген ончаш шоненыт. Но ты район гыч ты номинацийлан вес ешым ойыреныт улмаш, садлан нуно «Ялысе еш» номинацийлан келшен толыныт. Положений почеш, ялыште илыше, тӱрлӧ мероприятийыште да спорт таҥасымашыште чолгалык дене ойыртемалташ кӱлын. Насыровмыт чыла шотыштат келшен толыныт, вет нуно, чынжымак, тыгай еш улыт.
– Конкурс-влак ешым пеҥгыдемдаш полшат. Нуно ончыко каяш, шонымашке шуаш кумылаҥдат. Тыгай годым икте-весе кокласе кыл пеҥгыдемеш, куан шижмаш пуйто утларак почылтеш, – шонымашыж дене палдарыш Г.Насырова.
«Еш – тиде ор»
Лач тыге еш нерген манеш ава. Тушто икте-весе верч азапланымаш, вашла пагалымаш, йӧратымаш, эҥертымаш шижалтшаш.
– Чыла тидыжым ача-аван икте-весыштым пагалымышт гыч икшыве-шамычлан ончыктыман. Вет ме нунылан пример улына. Эллан чын да патриот рвезе-ӱдыр-влакым куштынена гын, мыланна, кугыеҥ-шамычлан тидым поснак шотышто кучыман. Мутым пуэнат – шуктыман.
Ешыштына «Икте чыла верч, чылан икте верч» девиз почеш илена. Пашамат чылан пырля шуктена. Дисциплинылан кугу тӱткыш ойыралтеш. Тидыже, очыни, офицер улмына денат кылдалтын. Вет ме эреак тыге иленна да тидлан йочана-влакымат туныктена, – манеш шуко шочшан ава.
Спорт пеҥгыдемда
Насыровмытын спортлан шӱман улмышт нерген кӱшнӧ палемдышна. Кеҥежым уло еш дене велосипед дене кудалыштыт, телым – ече дене коштыт. Тыгак посёлкысо Ий полатыште нуным чыланыштын коньки дене мунчалтымыштым ужаш лиеш.
– «Российын ечыгорныжо» акцийыш ушнымаш ешын йӱлашкыже пурен, манаш лиеш. Пытартыш ийлаште мемнан дене пырля ачалийшемат коштеш. Кажне гана йоча-шамыч да меат призёр-влак радамыште улына. Ӱмаште, мутлан, мемнам эн спортивный еш семын палемденыт да кубокым кучыктеныт, – мутшым шуя Гульнара.
Насыровмыт Марий Турек посёлко воктенысе Эҥерӱмбал ялыште лакемыныт. 2017 ийыште ача ден коча ешлан кугу пӧртым чоҥеныт. Нуно шке пакчам, изирак озанлыкым кучат. Тений, мутлан, сай урлык кайыквусым инкубаторышто пӱктыктен луктыныт.
Ты еш шке калыкшын йӱлажым жапла, кугурак-шамычым пагала, изирак-влакым чамана. Йочашт чын айдеме лийышт манын, ача-ава кӱлынак тыршат. Воспитатлымылан, тазалыклан, уш-акылым пойдарымылан кугу тӱткыш ойыралтеш. Лач тыгай еш-влаклан кӧра элна виян да пеҥгыде лиеш.
Ынде Насыровмыт регион кӱкшытыштӧ моло номинацийыште сеҥыше еш-влак дене пырля кундемнан чапшым Российысе «Идалыкын ешыже» конкурсышто аралат. Ме нунылан да моло еш-влаклан сеҥымашым тыланена!
Еш альбом гыч налме фото-влак.