Эртыше арняште ныл еҥ, Интернет гоч сатум налаш шонен, 100 наре тӱжем теҥгелан ондалалтын, палдара Марий Элысе МВД.
Ондалалтше-шамыч пушлан моторым, автомашиналан фарым, пиломатериалым да сотовый телефоным налнешт улмаш.
Звенигово районышто илыше 49 ияш пӧръеҥ увертарымаш сайтыште иномарке машинажлан фарым ужалыме нерген уверым муын. «Ужалыше» еҥ ик мессенджерыш возкалаш тӱҥалын, сатулан оксам ончылгоч колташ йодын. Пӧръеҥ оксам колтен, тылеч вара серымыжлан да йыҥгыртымыжлан вашештымым чарненыт. Эҥгек 26 тӱжем теҥгеш шуын.
Полиций пашаеҥ-влак увертарат: сатум онлайн налме-ужалыме годым тӱткӧ лийза! Сатум налмеке гына ужалыше еҥлан оксам колтыза.