Шочмо йылмынан вияҥын шогымашкыже этнокультур предметлам туныктышо-влак пеш кугу надырым пыштен толыт. Тачысе кечын шочмо йылмым туныктышо-влаклан рушла кутыраш тыршыше икшыве-влакым марла ойлаш кумылаҥдаш неле гынат, туныктышына-влак тидлан могай-гынат у деч у йӧным верештынак шогат.
Теве шукерте огыл Морко районысо этнокультур предметлам туныктышо-влак Нуж-Ключ школышто черетан методушем погыныштым эртарышт. Ты школым ынде ятыр ий моткоч чолга да виян туныктышо вуйлата. Л.В.Ефимован писе, ушан, шке сомылжым лийжак манын шуктышто. Тудо шке пашагорныжым Шӱргыял школышто тӱҥалын. Математике ден физикым туныктен.
Нуж-Ключ кыдалаш школышто 12 туныктышо 51 тунемшым шинчымаш кугорно дене ончыко вӱда. А шочмо йылме ден сылнымутым ынде шукертсекак О.Д.Пекпаева туныкта. Олимпиада Давидовнан урокыштыжо шинчетат, теве могай нелылык шинчалан перна: тачысе саманын икшывыжым марий йылмылан шӱмаҥдаш куштылгыжак огыл. Тиде нелылык дене кажне марий йылме туныктышо тӱкна. Но Олимпиада Давидовна шке уроклаштыже, урок деч ӧрдыжысӧ пашаштыже «руш» йочамат марла кутырыкта. Кузе уке гын, вет уроклаштына лач марий икшывылан вел ӱшанаш тӱҥалына гын, шочмо йылмым йӧратыше самырык тукым ялт шагалемын кертеш.
Садлан умбакыжат чыла этнокультур предметлам туныктышо-влаклан тыгак кыртмен шке сомылым шуктен толаш тыланем да кажныжын пеҥгыде чытышан улмыжо, шочмо йылмым уло чонжо дене йӧратен моштымыж дене кугешнен илем. Тек Морко кундемыште озаланыше марий шӱлыш ончыкыжымат вес кундемлан примерым ончыктен шога да виянрак вел лиеш.
Елена Григорьева, Морко районысо этнокультур предметлам туныктышо-влакын методушем вуйлатышышт.
Снимкыште: Нуж-Ключ школышто эртаралтше методушем погын годым.
