Курыкмарий район Эмӓн селаште Куприяшкинмыт ешыште чыланат чолга улыт: тӱрлӧ пашалан кумылаҥыт, сеҥымашыш шуыт але сай лектышым налыт.
Техникылан шӱмаҥда
Андрей Михайлович ден Любовь Владимировна 20 ий утла пырля улыт. Суртоза Н.Крупская лӱмеш Марий пединститутым тунем лекме деч вара Эмӓн кыдалаш колышто ОБЖ предметым лу ий туныктен. Тылеч вара тудо «Техник-авто» автошколышто водитель-влакым туныкташ тӱҥалын. Ты тунемме ийыште Андрей Михайловичым адакат школышко ӱжыныт да кугурак класслаште ешартыш шинчымашым пуаш темленыт. Ынде тудо йоча-влакым тракторлан шӱмаҥда.
«Мемнан районышто ялозанлык пашам ыштыше фермер але посна озанлык ятырак. Сандене тракторым кажне рвезе палышаш. Кажне еш гаяк мланде пашам шукта, меат пасушто ковыштам, пареҥгым да кешырым шынден ужалена. Тыгеже кеч-мыняр гынат окса полыш лиеш», – каласыш А.Куприяшкин.
Эмӓн ял шотан илемыште тудым чынжымак пагалат – депутатлан кок черет сайленыт. Сайлыме комиссийын участковыйжо семын пашам ышта. Тылеч посна тӱвыра мероприятий годымат вуйым ок шупш. Эше студент годымак «Пеледыш» ансамбльышке коштын.
Археологий пашаште
Любовь Владимировна, кӱшыл категориян туныктышо, Эмӓн школышто географийым да обществознанийым туныкта. Пытартыш созыв годым шке ял шотан илемыштыже тудым кумшо гана депутатлан сайленыт. Географийым туныкта гынат, археологийлан шӱмаҥын да йоча-влак дене пырля ынде 11 гана тыгай лагерьлаште лийын.
«Такшым Курыкмарий районысо археологический кӱнчымашлашке уло еш дене коштына. Ме республикысе археолог-влаклан шкенан кундемнам шымлаш полшена, – манеш Л.Куприяшкина. – Школыштына шукертак археологий отрядым чумыренам. Ты пашам шукташ кумылан йоча-влак эре улыт. Нунылан полевой манме йӧн дене илен ончашат оҥай. Тылеч посна тидыже проект пашаштым шукташ полша».
Тӱвыра аланыште тыршат
Л.Куприяшкина – Эмӓн тӱвыра пӧрт пеленысе «Шӧртньӹ жеп» ансамбльын чолга участницыже. Коллектив дене пырля «Мыры-2019» эстраде муро конкурсышто, Пеледыш айолаште, тӱрлӧ концерт ден посна мероприятийлаште участвоватлат.
Тылеч посна Куприяшкинмыт Сарапай тӱвыра пӧртын «Шанавӹл» фольклор ансамбльыштыже ешге выступатленыт. Кок шочшышт йочасадыште коштымышт годымак «Изи Шанавӹл» ансамбльыште мурен-куштеныт.
Аня ӱдырышт Микрӓк селасе В.Куприянов лӱмеш йоча сымыктыш школышто «Кӱсле» классым тунем пытарен. Школысо кӱслезе-влакын ансамбльышт дене Чебоксар, Сочи, Санкт-Петербург олалаште выступатлен. Музыкым йӧратымыже ончыкылык профессийым ойырен налаш полшен. Школ деч вара МарГУ-шко «Народная хореография» пӧлкашке тунемаш пурен. 2019 ийыште тудым тунем лектын да шочмо школышкыжо толын. Тыште Анна Андреевна кугурак вожатыйлан пашам ышта, музыкым туныкта да ешартыш образованийым пуышо педагог семын тӱҥалтыш класслаште «Ритмика» предметым вӱда. Тыгак тудо йочасадыш коштшо-влакын музыкальный вуйлатышышт.
Дмитрий эргышт кызыт Озаҥысе национальный исследовательский технологический университетыште кокымшо ий тунемеш. Шинчымашым налме направленийже – «Автоматизация и управление в технических системах». Тыгак сценыш чӱчкыдын лектеш: мура, кушта, шочмо тӱвыра пӧртыштӧ концерт-влакым вӱда, гитарым шокташ шкеак тунемын. Школышто гитарым шоктышо ӱдыр-влак дене пырля «Серебряные струны» коллективым чумыреныт. 2019 ийыште Эмӓн тӱвыра пӧртын отчётный концертыштыже жюри Дималан «Открытие года» номинаций дене дипломым кучыктен. Ты ийынак «Акпарс мландын ӱдыржӧ ден рвезыже» районысо конкурсышто школышто тунемше Вика Ефимова дене пырля сеҥеныт.
Ты ешыштак ятыр пашам Андрей Михайловичын аваже Валентина Петровна ворандара. Тудо ятыр жап верысе совхозышто бухгалтерлан пашам ыштен, а сулен налме канышыш лекмеке, эрге-шешкыжлан, уныкаже-влаклан изин-кугун полшен шога.
Л.В.Куприяшкина депутат пашаштат ойыртемалтеш: 2019 ийыште Эмӓн ял шотан илем верысе иницативе программе дене Кугу Отечественный сарыште лийше салтак-влак лӱмеш обелискым ыштен шогалтыме. Кодшо ийын школ воктене хоккей площадкым келыштарыме. Тушто шеф семын тунемше-влак пашам ыштат: лумым эрыктат, сӧрастарат.
Эльвира Терентьева.