2025-2026 ийласе теле пытартыш 35 ийысе деч ойыртемалтеш, манеш Йошкар-Олаште илыше да ятыр ий игечым эскерыше йолташна Геннадий Рыбаков. Тудо палдара.
Йӱштырак?
– Йошкар-Олаште пытартыш 35 ийыште телын кокла температуржо – 9,2 градус йӱштӧ, а тений – 9,3 градус йӱштӧ, утыжым огеш ойыртемалт. Рашрак ончалаш гын, декабрьыште кокла шот дене ончымаште 6,3 градус йӱштӧ (1991-2025 ийлаште 7,8 градус) шоген, тений январьыште 10,7 градус йӱштӧ лийын (1991-2026 ийлаште – 10,2), февральыште 11 градус йӱштӧ шога манын каласаш лиеш (1991-2026 ийлаште – 9,7 градус). Лектеш, тений декабрьыште молгунамсе деч йӱштырак, а январь ден февральыште йӱштырак лийын. А теве 1926-1960 ийлаште 12,5 градус йӱштӧ шоген. Тугеже теле 3,3 градуслан левештен.
Льоп-льоп
Пытартыш 47 ийыште Йошкар-Олаште телым леве игече (+1 градус да левырак) кокла шот дене декабрьыште 2,9 кече, январьыште 1,5 кече, февральыште 1,5 кече лийын. А тенийысе телым: декабрьыште – 5 кече, январьыште да февральыште тыгайже лийынат огыл. Ты жапыште 1987-1988 ийласе телым гына леве лийын огыл.
А лум лумеш…
Пытартыш 35 ийыште Йошкар-Олаште кокла шот дене декабрьыште 35 см кӱжгыт лум лумын (2025 ий декабрьыште – 43 см), январьыште – 39 см (тений 100 см), февральыште – 25 см (тений кызытеш 68 см).
Ты жапыште шуко лум лумын 2021-2022 ийлаште – 170 см, 2023-2024 ийлаште – 197 см, а тений – 211 см. Теве мом эше палемдыман, тенийутларакшым тыгыде лум тымык йӱдым йоген. Садлан лум мландым икшырымын тӧр леведын.
Марий Элыште мартыштат ситышын лумеш. Мутлан, 2013 ийыште эсогыл 80 см кӱжгыт возын, 2005 ийыште – 74 см, 2006 ийыште – 56 см.
Тений икымше лум 2025 ий 9 декабрьыште лумын да тетла шулен огыл.
А теве виян мардеж, поран ӱштмӧ годым пытартыш ийлаште лум шагалрак да шагалрак лийын. 2012 ий годсек поран шукыж годым лач февральыште ӱштеш. Теве шарналташ тений 1 февральым. Виян мардеж лӱшкен да 23 см кӱжгыт лум возын, пургыж верын-верын 60 см кӱжгыт марте шуын.
Кече лектеш, ончалеш
Телым кече шыратен онча гын, чонланат шокшынрак чучеш. 2008-2023 ийлаште Йошкар-Олаште ояр игече декабрьыште кокла шот дене кандаш кече дене шоген гын, 2024 ийыште ик кечат тыгай лийын огыл, 2025 ийыште – ныл кече гына.
2011-2023 ийлашет январьыште кокла шот дене 9 кече лийын, 2024 ийыште да тений – 12 кече дене, 2025 ийыште – кок кече гына.
2003-2020 ийлаште февральыште 9 ояр кече лийын, 2021-2024 ийлаште 15 кече дене, 2025 ийыште – 11 кече, а тений лу кече дечат шагал лиеш.
Йӱржӧ йӱреш
Пытартыш 45 ийыште Йошкар-Олаште телым йӱр 11 ийыште гына йӱрын, шукыж годым декабрьыште. Шагал огыл йӱр февральыште 1978, 1979, 1991, 1997, 2002, 2004, 2008 ийлаште лийын. А тений телым декабрьыште гына йӱр йӱрын, йӱын манашат ок лий, а шыжен, тудыжат кум кечым веле.