Кокла шот дене ончалаш гын, тений шыже молгунамсе деч левырак шога. Телат левырак ыле, теният утыждене йӱштӧ лийшаш огыл.
Сентябрьыште кажне ийын йӱр утларак да утларак йӱреш гын, октябрь левештен толеш.
Ноябрь тӱрлӧ лиеш: я леве, я йӱштырак. 1987 ийыште 10,2 градус йӱштӧ шоген гын, 2013 ийыште 2 градус леве лийын. А 2008 ий ноябрьыште кечывалым эн йӱштыжӧ (-1 градус) кок кече гына шоген. Тылзе мучко термометрын столбикше 0 градус деч ӱлыкыла волен огыл. Тений левыракат, юалгыракат лийын кертеш.
Пытартыш 37 ийыште ноябрьыште кокла шот дене 3 градус йӱштӧ шога. Ты жапыште 11 гана йӱр чот йӱрын, 1987, 1988, 1989 да 2011 ийлаште йӧршеш йӱрын огыл. 2016 ий 11 ноябрьым шукын шарнат дыр. Минусан температур шоген, 15 см марте лум киен гынат, йӱр чот оптен. Ныл кече гыч 18 градус марте йӱкшемден. Пытартыш 40 ийыште лум ноябрьыште 1982, 1991, 2009, 2014, 2017, 2019, 2021 ийлаште гына возын шуктен огыл. Ноябрьыште 2007, 2010, 2011, 2016 ийлаште шуко лум лумын.
Мут толмашеш: ожнырак икымше лум деч вара тылзе гыч лум возеш маныт ыле. Пытартыш 43 ийыште тиде 9 гана веле пеҥгыдемдалтын. Йӧршеш вара (кок тылзе деч вара гына) 2002, 2004, 2014, 2015, 2017 ийлаште возын. Октябрь-ноябрьыште кийыше лум 1 декабрьлан 1982, 1991, 2009, 2014, 2017, 2019, 2021 ийлаште шулен пытен. Эн ондак икымше лум 1993 ий 23 да 26 сентябрьыште лумын, а 25 октябрьыште возын да тетла шулен огыл.
Геннадий Рыбаков.
Йошкар-Ола.