Кызыт СВО-што улшо салтак-влаклан кундемнан тӱрлӧ верыштыже полышым пуат. Волжский район Пызырьгуп клубышто еҥ-влак носким пидыт веле огыл, а эше йӧрат. Тыгай носки пеш шокшо, йол огеш кылме, маныт. Украиныште спецоперацийыште кредалше салтак-влаклан таче тудо пеш кӱлешан. Ты паша кузерак кайыме нерген клубым вуйлатыше Г.В.Гурьянова деч йодыштым.
Ӱмаште шыжым клубышто носким йӧраш да пидаш тӱҥалыныт. Йӧраш ялысе калыкым Шарачаште илыше тале кидмастар, чолга ӱдырамаш Людмила Борисовна Иванова кумылаҥден. У ий деч ончыч носким кум гана йӧреныт да СВО-што улшо боец-влаклан колтеныт.
– Носким уло Шарача кундемыште пидыт да йӧрат. Ты пашам Людмила Борисовна виктарен шога. Тиде тале кидмастарым шукын палат. Мӧҥгыштыжӧ меж дене портышкемым, сумкам, упшым да молымат йӧра. Шкеже – Свердловск кундемын шочшыжо, руш ӱдырамаш. Тудо клубышкына кок гана толын коштын, мастер-классым ончыктен. Тыге меат ты пашаш ушнышна.
Носкилан келшыше тӱрлӧ тӱсан межым ял калыкын оксаж кӱшеш налме. Тидлан чылаже 14 тӱжем теҥгем погымо ыле. Носким портышкем гай йӧрена, но тудо вичкыжрак лектеш. Ик мужырым ямдылаш ныл шагат кая. Икымше гана ыштымеке, пешыже лектын огыл ыле. Но вара паша сайын каяш тӱҥале. Йӧраш неле огыл, но кид вийым йодеш. Чылаже ме 21 мужыр носким йӧренна.
Вашке уэш погынаш шонена. Салтак-влаклан полшаш кӱлеш. Ме огыл гын, кӧ тидым ышта? Шарача кундем гыч шагал огыл рвезе Украиныште спецоперацийыште кредалеш, – мане Г.В.Гурьянова.
СВО-што улшо боец-влаклан Пызырьгуп ялыште носким мӧҥгыштышт тачат пидыт. Тидлан шукынжо шке шӱдырымӧ межым кучылтыт. Кевытыште налме носким конден пуат. Галина Владимировнан мутшо почеш, 16 мужырым пидме. Шарача кундем гыч чылаже 44 мужыр носким СВО-шко колтымо.