манеш Волжский район Шеренгуп ялын ӱдыржӧ Мария Романова.
Мария, психолог лияш шонен, Н.Крупская лӱмеш Марпединститутыш тунемаш пурен. Кок вузым ушымо дене дипломыштыжо МарГУ возалтын.
2012 ийыште педагог-дефектолог специальность дене тунем лекше Мария Йошкар-Оласе 92-шо номеран «Искорка» йочасадыш психологлан пашаш кеҥежымак пурен. Тунамак тудлан воспитатель лияш темленыт.
– Ондак тукым акамын шонымашыжым шукташ да хирург лияш шонен коштынам. Но ала-мо гутлаште шонымашем вашталтын. Вет ме Шеренгуп гыч Памарыш школыш йолын каенна, тыгодым корнышто йочасадым эртенна. Варажым ушышкем шонымаш шыҥдаралтын: «Воспитатель паша могай сай, ньога-шамыч дене эре мод веле». Теве тачат тидымак ыштем, – манеш шыргыжалын икымше категориян воспитатель.
У пашаеҥлан кыдалаш группым кучыктен пуэныт. Тудо опытан воспитатель Надежда Ивановна Екимован шулдыр йымакыже логалын, ятыр сомыллан туддеч тунемын. Кызыт Мария Егоровна16 ӱдыр ден 11 эргылан кокымшо ава семынак. Йоча-шамычым аппликацийым ышташ уло кумылын туныкта, пластилин дене тӱрлӧ фигурым, картиным пырля шочыктат. Пытартыш жапыште кугу тӱткышым парня дене кылдалтше да тудым вияҥдыме шотышто пашалан ойыра, тидым «мелкая моторика» маныт. Ньога-влакым пӱгыльмӧ дене модыкта, кидпарняштлан массаж-влакым ончыкта, школлан ямдылыме шот дене клеткан тетрадьыште сӱретлаш, буквам возаш кумылаҥда.
Ты профессиян еҥ йоча кумылым налын моштышаш, икшыве ден ача-ава-влакланат авторитет лийшаш. Тидын шотышто Мария эре тунемеш, тӱрлӧ вере чолгалыкшым ончыкта. 2014 ийыште «Идалыкын воспитательже» рӱдоласе конкурсышто шке мастарлыкшым терген. Варажым Самырык воспитатель-влакын икымше молодёжный форумыштышт лийын.
Йоча дене шинчыме деч вара пашашке тений февральыште веле лектын, а кушко гына шуктен огыл?! Тазалык дене кылдалтше статьям ямдылен, тудо Йошкар-Оласе медколледжын савыктыме книгаштыже лектын. Август мучаште 9-ше микрорайонысо воспитатель-влаклан лач ты йочасадыште конференций эртаралтын. Тушто М.Романова «мелкая моторика» теме дене шуктымо пашаж нерген презентаций гоч каласкален.Тыгак «Марий кеҥеж» пайрем годым рӱдоласе набережныйыште икшыве-влакым атлас тасма дене кидшолым ышташ туныктен.
Группыж гыч кок йочан Российысе конкурслаште сеҥымашыжат уло. Икшыве-влак почеламутым лудмо да кидпашам ыштыме дене ойыртемалтыныт.
– Группыштына марий ача-ава-шамычын йочашт коштыт, но марла мутланымым колын омыл. Кызыт ньога-шамыч дене «Марий шыже» мероприятийлан ямдылалтына. Музыкальный вуйлатышына дене марий куштымашым шындена, иктаж-кӧлан почеламутым марла лудаш пуэм, мане тудо.
Василий пелашыж дене коктын кок шочшым ончен куштат. Кажне кечын нуно кумытын «Искорка» йочасадыш ошкылыт. Ныл ияш Кира ден кок ияш Саня (ешыште тудым тыге маныт) тушкак коштыт.
Мариялан тӱрлӧ персонаж семын йоча-влак деке мияшат келша. Тудо Шыже я Шошо вургемым чия, Вувер куват лияш ок ӧр, выпускной балыште Двоечницан рольжым модын , а 1 сентябрьыште – Незнайкан.