Оршанке посёлкысо «Ойгырышо ава» обелиск воктене кумдыкым уэмденыт. Районышто шочшо Совет Ушем Герой-влакын да Чап орденын тичмаш кавалерже-шамычын лӱмыштым возыман шарныктыш пырдыжым вераҥденыт.
Ты пашам «Инфраструктура для жизни» нацпроектын «Формирование комфортной городской среды» федеральный проектшылан келшышын шуктымо. Обелиск воктене у тротуарым шареныт, тошкалтышым, тулым вашталтеныт, мемориалыште Курымашлык тул йӱла.
– Кугезына-влакын подвигышт нерген шарнышаш да кушкын толшо тукымым палдарышаш улына. Тиде мемнан историйна, кугешнымашна да тауштымашна, – ойлен Марий Элым Вуйлатыше Ю.Зайцев.
Марий Элым Вуйлатышын пресс-службыжын колтымо фотожо.