Россий Президент В.Путинын инициативыж почеш элыштына «Без срока давности» проект шыҥдаралтеш. Марий Элыште тиде пашам «Бессмертный полк России» гражданско-патриотический мер толкынын регионысо пӧлкаже шукта.
Ты пӧлкам идалык ончыч почмо, но тудын пашажым Россий Президентын Мер проект-влак шотышто управленийжым вуйлатыше палемден, Рӱдӧ штаб организацийым патриотический инициативым вияҥдыме надыржылан наградитлен.
Февральыште кугу событийлан специальный военный операций тӱҥалмылан кум ий теммым шотлыман, а майыште элна Кугу Отечественный сарыште сеҥымылан 80 ий теммым палемда. Тудым эртарыме паша планым «Бессмертный полк России» толкынын регионысо пӧлкаже федеральный кӱкшытысӧ план негызеш ямдылен. Поснак кугу тӱткыш «АГИТФРОНТ» патриотический плакат студийлан ойыралтеш, кудыжым Марий Элын сулло сӱретчыже Андрей Санников вуйлата. Тыгай студий кызытеш элыштынат икте веле.
Ты гана «АГИТФРОНТ» студийым Мариупольыш Нахимовысо военно-морской училищын филиалышкыже ӱжыныт. Тылеч посна студийыш коштшо-влакын пашаштым СВО фронтышто блиндажлаште, Ленинград блокаде тоштерыште да Российын тӱрлӧ кундемыштыже ужаш лиеш. А Сеҥымашын 80 ияш лӱмгечыжлан студийын пашаже-влакым пӧлек шотеш кучыкташ келшыше альбомыш чумырат.
Ушештарена: «Без срока давности» проект Шочмо элын историйжым вашталтыме ваштареш, тудым шарнаш да самырык тукымым патриотизм шӱлышеш шуараш виктаралтын. Ик шонымашыже – медиа кумдыкышто нацизмым да киевский режимым моктымашым кораҥдымаш.
Фотом «Бессмертный полк России» толкынын регионысо пӧлкаже колтен.
