25 майыште Карелийысе Ремесла пӧртыштӧ Олонецкий районысо кидмастар-влакын «Nero» ончерышт почылтын.
Карел йылме гыч кусараш гын, тидыже мастарлык лиеш. Олонецкий районышто шун, пу, куэ кумыж гыч арвер-влакым ыштыше, куышо да тӱрлышӧ еҥ шуко. Мастарлыкышт тукым гыч тукымыш куснен да таче мартеат аралалтын. Еҥ-шамыч кугезе тукымышт семынак чон кумылым да вий-куатым Кечывалвел Карелийын пӱртӱсшӧ деч налыт. Экспозицийыште Ю.Журавлеван, М.Кудельникован да Р.Леонтьевын пашаштым ончыктымо.