Марий Элыште «Икымше каналын» тележурналистше-влак ынде икмыняр кече пашам ыштат. Марий калык да кундемна нерген «Непутёвые заметки» телепередачылан сюжет-влакым войзат.
Нуно Йошкар-Олан икмыняр мотор вержым сниматленыт, тыгак «Пеледыш пайремыште», Ежово селасе Мироносицкий монастырьыште, Юрино посёлкысо Шереметев замокышто лийыныт. Эртыше кечылаште Волжский район Карай кундемыште шудым солымо йӱлам да марий сӱаным войзеныт. Тидлан Карай школын туныктышыжо да тунемшыже, ял калык сайынак ямдылалтыныт.
Э.Иманаевын архивше гыч налме фото-влак.