Марий Элым Вуйлатыше Ю.Зайцев концлагерьын ийготыш шудымо узникше Парасковья Васильевна Арасланова дене вашлийын.
Ты ӱдырамашын пӱрымашыж почеш книгам возаш да фильмым сниматлаш лиеш. Шым ияшыж годым сар тӱҥалын. Ачажын да изажын фронтыш кайымыштым ужын. Немыч-влак ялыштым йӱлатеныт, а илыше-влакым тӱрлӧ концлагерьыш поктен наҥгаеныт.
Изи Парасковья Латвийыш логалын, аваж ден акаже – Германийыш. Тушеч утарымеке, нуно икте-весыштым муыныт. Пытартыш ийлаште Парасковья Васильевна Йошкар-Олаште ила. Икшывыже, уныкаже, кугезе уныкаже-влак тудын верч азапланат.
Кодшо тылзын П.Араслановалан «80 лет Победы в Великой Отечественной войне» медальым кучыктеныт. Марий Элым Вуйлатыше Сеҥымаш кече дене саламлен да пӧлекым пуэн.
– Ме ойыртемалтше жапыште илена: Кугу Отечественный сарыште кредалше-влак эше пеленна улыт, да передовой гыч кызытсе жапысе герой-влакым вучена, кудышт уэш Шочмо элна верч шогат, – палемден Ю.Зайцев.
Марий Элым Вуйлатышын пресс-службыжын материалже почеш Ирина ГУРЬЕВА ямдылен.
Марий Элым Вуйлатышын пресс-службыжын фотожо.