Илышыште тӱрлӧ нелылыкым вашлияш логалеш. Тыгай годым те мом ыштеда? Тидын нерген мурызо-влак деч йодыштына.
Аделина Батаева:
– Илышыште нелылык кажне айдемын лиеш, тиддеч посна огеш лий. Воктене лишыл еҥ-шамыч улыт да нуно полшен шогат гын, тудым чытен лекташ, шкем пеҥгыдын кучаш куштылгырак. Тиде ача-ава, шӱжар-шольо, пелаш, йоча-влак. Нуно эре воктенем улыт да кеч-кунамат полшат. Ешем дене моткоч кугешнем. Чыла неле-йӧсым чытен лекташ кугун полшат.
Надежда Степанова:
– Тыгай годым эн ончыч тиде нелылыкым икмыняр кече чонышто нумалат, кузе тыге, молан тыге манын, вуй йыр шонкалет. Тунам нимогай чын решений лийын ок керт. А вара яндар вуйуш дене шоналтымеке, чылажат шке верышкыже шинчеш. Мутат уке, нелылык годым муро гына полша. Мурет – лыпланет, чон пушкыдемеш, илыш йӧршын вес сынан лиеш. Неле-йӧсым, куаным муро дене веле пайлем.
Надежда Крылова:
– Илышыште иктаж-могай нелылык лектеш гын, эн ондак лӱдат, ойгыраш тӱҥалат. Ик жап гыч, лыпланымеке, тидым шонкалет, анализироватлет. Тыге эркын-эркын ты нелылык гыч лекташ йӧным кычалат. Лишыл еҥ-влак воктенет улыт гын, полшен, ой-каҥашым пуэн кертыт. Тыгай полышым мый аклем.
Тӱрлӧ ситуацийыш логалынам. Мыйын шонымаште, тиде тыгай тошкалтыш, кудо пеҥгыдын шогаш туныкта. Илышыште кажне проблемым решатлаш лиеш. Тидлан лач жап да вий, лӱддымылык кӱлыт.
Сергей Байназов:
– Артистын илышыже тӱжвач ончымаште пеш куштылгын чучеш: эре мурен-куштен гына ӱмырым эртара манын шонат, а илыш чылалан нелылыкым пуэнак шога. Тидын годым мылам родо-шочшем полшат, йолташем-шамычат кидым шуялташ эре ямде улыт. Пашам шукырак ыштыман да, мутат уке, Поро Юмылан ӱшаныман. Ӱшанет гын, тудо чылалан полша.
Иван Соловьев:
– Нелылык гоч айдеме тергымашым эрта, а тиде тергымашым айдемылан Юмо колта. Южгунамже сулыклан кӧра, южгунамже айдемым пеҥгыдемдаш але ушым пурташ. Илышыште нелылык тӱрлӧ семын лектын кертеш: иктаж-могай проблеме, чер, ойго, умылыдымаш, кӧргӧ намыс да тулеч моло. Кажне нелылыкым тӱрлӧ семын эртыман, ала-кудыжым тӱкыманат огыл, шонем.
Ончылно кеч-могай неле йодыш лекмеке, кузе тидым тӧрлаш лиеш манын шонем. Кагазышке возем да тӱрлӧ могырым шонем: тыге але вес семын ыштем гын, мо лийын кертеш умбакыже? Каҥашымат йодын сеҥем, ӧрдыж гыч сайрак коеш. Но эн тӱҥжӧ – тыгодым ойгырыман огыл, вет тургыжланымаш чытамсырлыкым луктеш, да проблеме эшеат чот ешаралт сеҥа.