Кумдан палыме «Реальные пацаны» телесериалын йӱкрежиссёржо Валентин Ушаковын ӱмыржӧ 2023 ий шыжым спецоперацийыште кӱрылтын.
Изинек уста
Валентин Ушаков Звенигово район Кужмарий селаште шочын-кушкын. Йоча годсо пагытше ты кундем дене кылдалтын. Тудо изинек усталык шӱлышан рвезе кушкын. Тыгак спортым, колым кучаш йӧратен.
Пырля тунемше ӱдыр-рвезе-шамыч Валентинын поро кумылан да еҥ-влак дене кылым муын моштымыжым палемдат. Тудо шке шонымашыжым радамлен моштышо, ушан лийын.
Школ деч вара Йошкар-Оласе политехнический лицейыште шинчымашыжым нӧлтен. Кӱшыл шинчымашым налаш Марий Элысе Президент пеленысе институтын финансовый факультетышкыже тунемаш пурен. Но ала-могай амаллан кӧра тудым тунем пытарен огыл.
Кино паша
Варажым самырык еҥым армийыш налыныт. Тушеч пӧртылмеке, землякна Моско областьысе Балашиха олаш илаш куснен да элнан рӱдоласе ик кинокомпанийыштыже карьерым чоҥаш тӱҥалын. Тушто тудо «Реальные пацаны» сериалыште тӱҥ рольым модшо Николай Наумов дене палыме лийын. Ончыкыжым нуно тӱрлӧ проектыште пырля участвоватленыт. Валентин тыгак «Папины дочки», «Патриот» сериал-влакым, «Кука», «Вива, Кастро!» фильм-шамычым шочыктымаште шке кышажым коден.
Элым аралаш
2023 ий сентябрьыште Ушаков Россий Обороно министерстве дене контрактым шке кумылын пеҥгыдемден да спецоперацийыш каен. Землякна мотострелковый войска-влакын штурмовой отрядыштыже служитлен. Тушто лиймыж годымат артист йолташыже Николай Наумов дене кылым кучен. Варажым актёр Валентинлан да тудын йолташыжлан спецопераций кайыме кумдыкыш гуманитарный полышымат колтен.
Чаманен каласыман, 28 октябрьыште командованийын боевой заданийжым шуктымо годым Ушаков деч тораште огыл мине пудештын, землякна нелын сусырген. А тудым тушеч эвакуироватлыше санитар группо тушманын дронжо йымаке логалын. Санитар-влак тунам нелын сусыргеныт, Ушаков колен.
Салтакым шочмо-кушмо кундемыштыже тоеныт. Тудын аваже, пелашыже да эргыже кодыныт. Валентин Ушаковым Патырлык орден дене колымекыже палемденыт. А «Реальные пацаны» сериалын авторжо-влак финалысе эпизодым коллегыштлан пӧлекленыт. Тушто нуно спецоперацийын чын салтакше-шамыч дене сценым войзеныт.
«Защитники Отечества» фондын Марий Элысе филиалжын материалже негызеш ямдылыме.