Кызыт кажне гаяк еҥын соцсетьлаште шке лаштыкше уло: самырыкынат, илалшынат. А тушто мо гына огеш возалт: иктылан шоя серышым колтен, банк картше гыч оксам шолыштыт, весылан, кугу пашадарым сӧрен, пашам темлат. Оксам йомдарымыже чот кугу ойго огыл, но кунам йочам тюрьмаш шындат — азап. Шукыж годым ийготыш шудымо-влак тыгайыш логалыт. Наркотикым шаркалыме ваштареш могай паша ышталтме нерген Марий Эл Республикысе МВД-н Наркотикым кучылтмым тергыше управленийысе профилактике пӧлкан вуйлатышыже Наталья Геннадьевна ОТМАХОВА каласкала:
— Республикыштына икмыняр ий «Антинаркотический десант» акций кая. Нарколог, психолог, МарГУ-н да Волгатехын волонтёрышт, Марий епархийын еҥже-влак дене погынен, программым ыштена, а вара школлаште вашлиймашым эртарена. Кодшо ийлаште актовый кугу заллаште мутланенна. Кызыт изирак аудиторийым поген, умылтарыме пашам ыштена. Тыгак ача-ава, туныктышо, администраций пашаеҥ-влакым погена. Наркотикым шаркалымылан могай наказанийым пуымо, йочам кузе тыгай шакше койыш деч аралыме нерген, каласкалена. Мутлан, Козьмодемьянскыште тыгаяк акцийым эртарыме годым ача-ава деч «закладки», «соль» нерген йодна. Нуно тидын нерген огыт пале, а йоча-влак мо тиде тыгай, ойлен пуышт. Сандене ача-ава-влакланат умылтараш кӱлеш.
Кодшо ийын «Антинаркотический десант» дене республикысе куд районыш миенна. 18 мартыште Шернур районысо икмыняр школышто лийна.
Наркотикым шаркалыше-влак соцсетьыгте ӱдыр-рвезе-влаклан возат, кугу пашадарым тӱлаш сӧрат. Тыгодым нигӧ тидын шотышто нимом пален огеш нал, нимогай ответственность тидлан уке манын шона. Икманаш, тӱрлӧ йӧн дене сымыстараш тыршат. А кызыт самырык еҥ-влак чапле гаджетан лийнешт, йолташышт дене кинош коштнешт, а тидлан окса кӱлеш. Сандене «закладкым» ышташ келшат, вет тидлан оксам тӱлат. Но тиде кужу жап огеш шуйно, ик-кок тылзе гыч полиций пашаеҥ-влак нуным садак кучат. Тылеч вара сай илыш пыта. Умбакыже следствий да тюрьма вучат, а тушто илыш сайжак огыл. Тыге ончыклык илышлан кугу чарак лиеш.
Ийготыш шудымо-влакым 3-5 ийлан колонийыш колтат.
Йоча-влакым тыгай паша деч кузе аралаш?
— Икшывыда дене мутланыза, кечым кузе эртарымыжым, мом ыштымыжым, шекланыза, йолташыже-влак нерген йодса.
— Йоча кӧ дене келшымым, пален налза.
— Шерге телефоным конда, но те тудым налын пуэн огыдал гын, кушто тидлан оксам муын — йодса.
— Соцсетьласе лаштыкшым тергыза.
-
Кодшо кеҥежым ик ӱдыр оксам ышташ шонен. Интернет дене пайдаланен, наркотикым налын. Изирак пакетыш оптен. Олаште вич верыш пыштен коден. Тыгай сомылым шуктымыж годым тудым полиций пашаеҥ-влак кученыт. Ӱдырым 4 ият 6 тылзылан тюрьмаш шынденыт.
-
10-шо классыште тунемше тыгак пакет-влакым оптен коштын. Кӱсеныштыже 37 закладкым муыныт, а мӧҥгыштыжӧ – висам да опташ келыштарыме арвер-влакым. Тергыме паша кая.
-
7-ше классыште тунемше рвезе Чебоксар олаш сатулан коштын. Вара Йошкар-Олаште шаркален. Тергыме паша кая.
-
Волжск олаште ӱдыр наркотик нерген уверым шке лаштыкышкыже возгален. Суд 4000 теҥге штрафым тӱлыктен.
-
Волжск олаште ӱдырамаш кыне сӱретан носким ужален. Тудлан суд 40000 теҥге штрафым тӱлыктен.
16 -27 мартыште «Сообщи, где торгуют смертью» акций эртаралтеш.
Уверда уло гын,
8 (8362) 68-00-00 номер дене йыҥгыртыза.