Ача-ава — Дима да Шурик дене.
Тений августышто Оршанке район Тошто Крешын ял гыч Алевтина Шанинан арня жапыште кок эргыжым почела тоен пыштымыж нерген пален налмекем, тиде ӱдырамашым ом пале гынат, чонлан моткоч нелын чучо: кузе тудо чыла тидым сеҥен лектеш, мо тудлан илашыже вийым пуа, кузе чонжым кеч изиш лыпландарыман, кузе полшыман?..
Теве Алевтина Шанина дене кухньыштыжо чайым йӱын кутыркален шинчена. Кок эргым тоен пыштыше авалан уто мутым ойлашат ӧрам, ала иктаж темым келгынрак тарватем гын, чонжылан эше нелырак лиеш, шонем. Коеш, виян ӱдырамаш. Вет эше ик эргыже кызыт – Украиныште.
Тений февральыште Украиныште специальный операций тӱҥалмеке, тушко элна гыч эн ончыч контракт почеш служитлыше-влакым колтышт. Нунын коклаште Оршанке район Тошто Крешын ялын шочшыжо Дмитрий Топкаеват ыле.
Шочмо эл дене контрактым подписатленат гын, нигӧ тый дечет тушко каяш кумылет уло але укем огеш йод. Приказым шуктыман, Шочмо элым аралыман! Тыгак шонен 23 ияш Дмитрий, тыгак шоненыт тудын иза-шольыжо-влак, ача-аваже. Но нигӧжат эрге тушан вуйым пышта манын шонен огыл, чылан сайлан веле ӱшаненыт.
Эргым, тый денет кугешнем
Школ деч вара Дима Йошкар-Олашке Поволжский университетыш тунемаш каен, но тудым кокымшо курс гыч кудалтен. «Тыште тунемме специальностем мылам ок келше», – манын аважлан. «Тугеже тыйым армий вуча», – шижтарен аваже. Тыге Дима 2018 ий 5 декабрьыште срочный службыш каен. Тыге 186 см кӱкшытан Дима ВДВ-ште служитлаш тӱҥалын. Тудо ондак Омскышто учебкым эртен, вара Ивановыш наҥгаеныт. Вес ийжылан октябрьыште контрактым подписатлен. «Ала огешат подписатле ыле, но ме Сергей изаж дене коктын тудлан каласышна: «Ялыш толат, специальностет уке. Мом ышташ тӱҥалат? Айда контрактым ыште», – ойла аваже. Сергей изаже тудо жапыште Кечывалвел Осетийыште контракт дене служитлен.
Контракт почешат Иваново олашак кодын. Тыге Ивановысо десант дене пырля Украиныш каен. Январьыште эн ончыч Белоруссийыште учебкым эртеныт. Дима 5 февральыште аваж дек йыҥгыртен да Брест крепостьышто экскурсий дене коштмышт нерген куанен ойлен.
А вара 7 март йотке туддеч нимогай увер лийын огыл. Ава чон вургыжын. Эргыжым кычалын, тудо тӱрлӧ вере йыҥгыртен…
УМБАКЫЖЕ 2022 ИЙ 18 НОЯБРЬЫСЕ НОМЕРЫШТЕ ЛУДСА. Электрон версийым САЙТЫСЕ КЕВЫТЫШТЕ налаш лиеш.