Марий Элым Вуйлатыше Ю.Зайцев республикыште илыше Пашан ветеранже Т.П.Захаровалан «Ленинградым фашист блокаде гыч тӱрыснек утарымылан 80 ий темме лӱмеш» знакым кучыктен.
– Мый кызыт Санкт-Петербург гыч гына толынам. Тушто Ленинградым утарыме верч эртаралтше торжественно-мемориальный мероприятийлаште лийынам. Тендан деке пурыде ом керт. Палем, Те блокадым йоча годым чытен лектында, тудо тӧрлаташ лийдыме кышам коден. Ленинградыште илыше-влак кугу подвигым ыштеныт, патырлыкын да тале улмын символжо лийыныт. Моткоч кугу тау Тыланда, – каласен Юрий Зайцев.
Т.Захарова кум икшывым ончен куштен, вич уныкаже уло. Пашан ветеранжылан «Жителю блокадного Ленинграда» знакым пуымо.