Кугу Сеҥымашын музыкшо, марий муро-влак, калык композиций у аранжировко дене: теве мо дене 2025 ийыште ӧрыктара «Песни России» Всероссийский фестиваль-марафон.
Юл кундем федеральный округышто тиде фестиваль-марафон 6 июньышто Марий Элыште тӱҥалын, а 16 гыч 26 июнь марте Кострома областьыште шуйна. Тидым Вологда область 7 июльышто мучашла, а тушеч коллектив-влак мӧҥгышкышт каят – кугу да кумда усталык марафон нерген икте-весе дене шке шонымашыштым почаш, налме опытышт дене пайлалташ.
«Песни России» проектым «Народная певческая культура» поро кумылан фонд «Единый Россий» партий да федеральный Тӱвыра министерствын организационный да финансовый полышыжлан кӧра илышыш шыҥдарен.
Проектын авторжо да художественный вуйлатышыже – Надежда Бабкина, фестиваль-марафонын директоржо – Сергей Рябов.
Икманаш, Российын 46 субъектшын 16 млн утла еҥже тиде усталык марафонышко ушна. Кызыыт марте статистике тыгайрак. 1000 утла фестивальный мероприятийым эртарыме, тышеч – 145 мастер-класс, 700 гала-концерт, 60 пресс-конференций. «Песни России» фестиваль-марафон 300 профессиональный ден 5000 самодеятельный коллектив-влакым иктыш ушен. А ончаш мийыше калыкше пытартыш данный почеш Российыште илыше еҥ-влакын 10 деч шагал огыл процентшым авалтен.