Марий Элыште июль тӱҥалтыш марте «Формирование комфортной городской среды» федеральный проект почеш 40 верым уэмдыме, тышеч 25-ше – калык коштмо вер, молыжо – кудывече.
Тӱҥ шотышто йолешке-влаклан корным ыштат, тул дене волгалтарат, изи архитектурный формо ден ужар кушкыл дене сӧрастарат. Иктыже – Волжский район Приволжский посёлкысо Сеҥымаш аллей. Тудым 2017 ийыште уэмдаш тӱҥалме, 2019 ийыште асфальтым шарыме, тенгылым, урным шогалтыме. Тений аллейыш пурымаште монтажым ыштыме, фонтанысе пырдыжым мрамор дене сылнештарыме.
Марий Эл вич ийыште ты федеральный программыш логалаш 11 йодмашым колтен, кудытшо сеҥен. Кызыт кум объектым мучашлыме, а вес кумытыштыжо паша эше шукталтеш.