12 мартыште Марий Эл Республикысе Тӱвыра, печать да калык-влакын пашашт шотышто министерствын коллегийжын заседанийже лийын. Тушко Марий Элым Вуйлатыше Ю.Зайцев миен коштын.
Кундемыштына Россий Президентын инициативыж почеш эртарыме «Культур» нацпроект почеш паша сайын шукталтеш. Инвестицийын кугытшо 1,5 млрд теҥгешке шуын. Пытартыш жапыште 8 модельный библиотеке почылтын, 6 йоча сымыктыш школ ден 14 тӱвыра пӧрт уэмдалтыныт. Йошкар-Олаште Яков Эшпай лӱмеш Марий кугыжаныш филармонийлан у полатым чоҥымо, Юрино посёлкышто Геннадий Лосев лӱмеш историко-художественный тоштерым капитально олмыктымо да моло кугу пашам шуктымо.
Кызыт рӱдолаште Марий самырык театрлан кугу да чапле полатым ямдылат, Волжскышто «Родина» кинотеатрым йоча сымыктыш школлан ачалат.
2024 ийыште тӱвыра отрасльлан республикысе бюджет гыч 2,6 млрд теҥгем ойырымо. А «Культур» нацпроектым илышыш шыҥдараш 691,6 млн теҥге палемдалтын. Туддене ялысе 5 тӱвыра пӧртым да М.Н.Янтимир лӱмеш литературно-этнографический тоштерым олмыктыман, кум тоштерлан у оборудованийым да ныл йоча сымыктыш школлан семӱзгар ден тунемме материалым налман.
Тыгак Марий Элыште кызыт Финн-угровед-влакын Российысе научный конференцийыштлан да Марий калык погынлан (Йошкар-Олаште эртышаш) да всероссийский Сабантуйлан (Медведево посёлкышто лийшаш) ямдылалтыт.
Марий Элым Вуйлатыше Ю.Зайцев тӱвыра пашам шуктышо-влакым саламлен да кодшо ийысе лектыш шотышто мокталтен. Тудо 2023 ийыште тӱвыра пӧрт ден клуб-влакын эртарыме мероприятийыш 7,1 млн еҥ миен, тидыже историйыште эн кугу цифр манын. А вара вуйлатыше ойыртемалтше-влаклан наградым кучыктен.
Д.Речкинын фотожо/ Марий Элым Вуйлатышын пресс-службыжо.