«Транзит заботы» социальный грант почеш пашам кок тӱрлын чоҥымо. Иктыжым «Мӧҥгысӧ микрореабилитационный рӱдер» манын лӱмдымӧ, весыжым – «Лектын коштмо микрореабилитационный рӱдер». Икымшыже Йошкар-Олаште илыше ешла дене сомылым виктара, кокымшыжо республикысе куд районышко (Курыкмарий, Шернур, Морко, Параньга, Советский, Юрино) лектын коштеш да тусо йоча-шамычлан полша.
Кодшо ийын апрельыште Йошкар-Оласе начар тазалыкан йоча-влаклан реабилитаций рӱдер «Транзит заботы» социальный проект почеш пашам тӱҥалын. Ты проектлан Неле илыш ситуацийыште улшо икшыве-влаклан полшышо Российысе фонд 4 млн 734 теҥгем ойырен.
Тидын нерген кодшо кечылаште рӱдерым вуйлатыше Любовь Филимонова каласкалыш. Тудын мутшо почеш, рӱдерын специалистше-влак ты проект почеш 84 йочалан тӱрлӧ полышым пуаш палемденыт. А чумыр пашам 2022 ий сентябрь марте шуктышаш улыт.
…
Пагалыме лудшо-влак! Ты рӱдерын воспитанникше-влаклан полшаш кумылда уло гын, тидым ыштен кертыда. Кызыт рӱдер йоча-влакын сӱретыштым футболкышко печатлен луктын да тудым тыланда налаш темла. Икшыве-влаклан шке шӱм шокшыдам ида чамане!
ФОТОШТО: тыгай оборудованийым проект почеш пайдаланаш пуат.
