Колумб лудмаш – 2024
Кажне кеҥежым Морко районышто регион-влак кокласе Валентин Колумб лудмаш сылнымут-сылнысем пайрем эрта. Тений тудо чапланыше поэтнан шочмо Мызэҥер ялыштыже 28 июньышто лиеш да кок кугу датылан – Морко районлан 100 ий, тыгак Мызэҥер яллан 250 ий темме лӱмеш – пӧлеклалтеш.
Конкурсыш ончычсо семынак регионлаште да республикысе ола ден районлаште ойыртемалтше-влак погынат. Лудмаште Валентин Колумбын поэзийже марла да вес йылмыла дене, Морко районышто шочшо поэт-влакын почеламутышт, тыгак автор-влакын шке возымышт йоҥгалтыт. Мурымаште Валентин Колумбын да Морко районышто шочшо поэт-влакын мутыштлан але шке возымо муро-влак шергылтыт.
Конкурсант-влак ийгот шот дене аклалтыт. Сеҥыше-влак кум степенян диплом да шарнымашан пӧлек, участник ден вуйлатыше-влак сертификат дене палемдалтыт.
Конкурсыш ушнаш шонышо-влак йодмашым «Морко ЦКС» МБУК-ын методике пӧлкашкыже metodmorki@yandex.ru электрон адрес дене колтышаш улыт.
Ю.ИСАКОВ