Пионерийлан тений 100 ий темеш.
Ятыр тӱжем йочан пионер жапше оҥайын, веселан да пайдалын эртен.
А те, пагалыме лудшо-влак, пионерыш пуртымо жапым вученда мо? Кузе пуртеныт? Кӧ галстукым пижыктен? Галстукым нумалаш келшен мо? Можыч, те пионер лагерьыште каненда? Але вожатый пашамат шуктенда? Сералтыза нине йодышлан изирак ойлымашдам да пеленже фотографийдам колтыза.
Любовь Кириллова, Морко районышто рӱдӧ клуб системым вуйлатышын алмаштышыже:
– Тусо жапым шарналташ тарватышда. Уло кумылын пионерыш пураш ямде улам ыле. Сайын тунемынам, чолга ӱдыр лийынам. Спорт таҥасымашлашке коштынам, редколлегийын членже семын пырдыжгазетым пырля луктынна. Адакшым отрядын командиржылан, старостажлан эре сайленыт, варажым мыйым школ советыш пуртеныт. Галстукым шке изам пижыктымыла чучеш. Чонем вургыжын, тидым чотак шарнем, пидаш кузе кӱлешыжым, кужу жап тунемынам, а вара школ вургемым чиен шогалмеке, кажне кечын куанен кылдем ыле. Пионер жап годым тимур командым, сводный отрядым чоҥымо. Мыланна, пионер-влаклан, комсомолец-влак мом шӱденыт, тудым ыштенна: кова-коча-влаклан пум оптет ма, пӧртым эрыктен мушкат ма, пакчам сомылет ма… Нине паша-влакым штабыште чылан пырля пенгыдемдыме. Чынак, пеш сай пагыт лийын.