Пионерийлан тений 100 ий темеш.
Ятыр тӱжем йочан пионер жапше оҥайын, веселан да пайдалын эртен.
А те, пагалыме лудшо-влак, пионерыш пуртымо жапым вученда мо? Кӧ галстукым пижыктен? Галстукым нумалаш келшен мо? Ала те пионер лагерьыште каненда? Але вожатый пашамат шуктенда? Сералтыза нине йодышлан изирак ойлымашдам да пеленже фотографийдам колтыза.
Эльвира Куклина, «Интеллектуал» тӱвыра-увер рӱдерым вуйлатыше:
– Шарнем, Кужэҥер район Руш Кугунур ялысе тошто школышто тунемынна. Ме, кумшо классыште улшо октябрёнок-влак, пионерыш пураш ямдылалтынна. Товатлымашым тунемынна, галстукым налме. Шошым ик ийлан кугурак-влак мыланна линейке годым обелиск воктене галстукым пижыктышт. Ты пагытым вученам да ямдылалтынам. Тунам тыгай вашталтыш лийын кайыш: 11-ше классым ыштыме дене ме кумшо гыч вигак визымшыш вончышна. Ме Йӱледӱр школыш кайышна. 1 сентябрьыште каласышт: «Галстукым огыда чие гынат, лиеш».
Йоча-влак галстук деч посна толыт ыле, а мый ик идалык кажне кечын галстукым пижыктенам. Мылам тудым кылдаш моткочак келшен. 5-ше классыште улмо годым почёт оҥасе фотокартычкыштат галстукан лийынам. А 6-шо классыште улмем годым иктат галстукым ок пижыкте ыле, мыят поген пыштенам.